#180 刻苦（16/11/2025）

最近有晚 Dustykid 團隊同事嚟我公司傾嘢，佢哋之前係未嚟過的，如果第一次上嚟嘅朋友我都會帶佢哋行個圈，介紹下唔同位置咁樣，而一般我去到最後就會介紹自己個位，亦即係圖片中嘅依張摺檯摺櫈。當我指出依個就係我嘅位嘅時候，佢係好驚訝 。我話係㗎，依個真係我嘅位。

其實曾經有一段時間，我係好唔鍾意我自己嘅位同情況 。我身邊每個朋友都係出入甲級寫字樓，可以返工著得企理打呔，省靚對皮鞋時，我返工著白色衫都唔得，因為工廈環境基本上一定會 hi 到啲機油/塵 等。同人哋公司開會 zoom meeting，自己背後往往係各種嘅機器聲/人叫囂聲，我想靜靜地講個電話有時都難。有時當真係有啲好緊要嘅電話要傾時，背後仲有第啲人喺度嗌，機器又馮馮聲，聽唔到對方講咩，都真係覺得好醜怪。

亦都最近有另一間大公司嘅團隊來到，我咁啱show 我喺個 mon 到正在整緊網站嘅圖，佢好驚訝為何依啲嘢係我做。不過其實細公司做嘢就係咁 —— 但依個我承認係有一個平衡要拿捏，如果太過將所有野綁哂上自己身做無分工無團隊合作係行唔遠，但一個小生意太去追求要去樣樣嘢好好睇又依個同事嗰個同事，係我依幾年見好多係會出事係會執笠。

但依啲嘢係好有趣，我留意到似乎因為依樣嘅好貼地嘅工作環境，可能亦幫助到我工作，因為就係咁先可以常常還在努力，還在努力嘅過程 。

不過其實依個過程中會覺得真係好辛苦，因為好多臨時嘢、突發嘢，全部都會要自己面對處理。好似最近就係咁，有啲貨做咗出來，係好有可能未必有人發現有問題但自己覺得有問題，係即時要解決問題 。公作就係好多問題都要每日解決，而救火同時又要搵到位執注入 vision 同 planning 去帶公司前行，依個係緊要嘅，亦都係我任務 。