#183 必須要行得正以及有一個正的心（07/12/2025）

今個星期樂富開店，開店一日朝早影一影間舖，恰好有對母女攝鏡，小朋友拖住媽媽衝入來，幾好幾好。

曾經同一啲其他中小企嘅老闆傾計，大家傾下互相生意如何云云，有時同多啲唔同嘅人去傾，會慢慢歸納到唔同人嘅內在如何，係會反映到喺外在到，亦會影響到出嚟嘅效果。譬如說一個人如果佢做生意只係諗自己，唔係太理會究竟依件事是否對於個社會好，係唔係對於消費者/其他人公平，有冇方法可以令到所有人都更加得益，如果係咁嘅話，大部份情況其實佢哋都行唔遠 。如果一個人佢係憑心去做事做事嘅時候，會諗其他人嘅感受，亦都去做事係為社會大眾好，無論佢做啲乜嘢，即使中間有遇到困難或者如何，可能佢會經歷更多痛苦，但我信佢都最後會係更成功。 

實在喺依幾年，我見到太多唔正氣，做事只為一時短期之利潤，或者嘗試將啲嘢包裝粉飾就當係，然後咁樣推銷出去，或者係想搵位賺「光環」，搏取認同嘅人，我勸佢哋唔好咁做，因為無好結果 —— 所有事情都係要一步步要真係做好先可以行到遠 。可能開頭無咩人睇到事情嘅本質，但耐咗一定會有人發現，就好似有啲老闆對自己同事好差，可能以前都未必有人會特別講，但社會依家資訊咁發達，其實一定紙包唔住火。因此倒不如做返好自己，係就係行得慢啲但至少行得係對得住自己同其他人。可能中間都會做得唔好㗎！人無完人，但至少個大方向正確，如果最後都係失敗，咁就真係無辦法。