世界變得好快，而我覺得若然喺工作上喺社會入面，唯一可以永遠唔需要變嘅就係去成為帶動改變嗰一個，依一個位置我覺得係最好嘅位置嚟，亦都係一個最安全嘅位置。Trust me，你睇古今中外，當有第一個人發明咗一啲嘢，之後就會一定有人跟，抄襲佢。我就叫依個人叫「二號公司」。依個「二號公司」你唔好以為佢會可以企好耐，因為佢做咗之後，會有其他三號公司、四號公司，然後「二號公司」因為佢唔係自己識得去創作嗰間公司，因此其實佢都生存唔到，三號公司、四號公司平過佢！快過佢！多款過佢！好過佢！咁「二號公司」就會玩完。
喺過去幾年，我曾經都好迷失到底我自己可以點樣做落去，論錢，我不及床品界嘅大企業大公司，論規模、營商經驗，我亦不及人，論生產廉價，我亦未能夠人。我喺依個位置係有啲迷失，我只係一個有啲主意想將主意化成現實嘅「0靚仔」，我相信依個香港都同我咁上下嘅人都有幾千，再論成個中國，成個世界，人數多到數唔哂，而更多人係比我喺唔同方面優勝，我如何先可以做到落去？我如何可以做到啲嘢係可以真係長久做到落去？若然你繼續咁樣諗落去其實係無的，但化作去任何行業都係，又有AI又有各樣，總有人喺你嘅行業可以做得好過你又平過你，你憑咩去可以出到糧？係，你可以話唔好要求咁高，只要不是太差，你做到社會平均值以上就可以出到糧，但我覺得依個位置唔係好安全，因為你唔係帶領嗰一個，有一個再勁啲嘅人入嚟，或者行業一變有衝擊（試諗下智能手機淘汰幾多行業，曾幾何時菲林相機同埋沖曬店現在都無了），你就玩完。因此好唔安全。喺上面第一段例子內，如果你只係一個做到平均值以上嘅普通喺行業嘅人，你就係「二號公司」「三號公司」，「四號公司」一嚟到平過你好過你時，你就玩完。
依個問題就係引到我諗其實最FINAL最後真正可以令公司長期做落去，係就係要 Lead the market，be the innovator。依個係唯一亦係最安全嘅地方。Constantly be the one that brings out new incredible products. 因為咁樣先係真正可以長做落去的方法。當然，你喺做依啲嘅同時你都要必先將本業做好，喺營運公司上你不能夠係做得差，人有你也要有，但要比人更佳 。
#186 2025 回顧（28/12/2025）