最近收到有位客人入伙買咗我哋嘅新床單同被袋，入伙後 send 咗 email 過嚟，寫得好有心，係一名 Dustykid 支持者寫嚟，問準客人許可，喺度分享，亦都已代佢轉達祝福比塵爸阿 Rap。實在好多謝佢亦都好多謝其實好多唔同客人同我哋嘅不論係網上嘅打氣，還是係有時嚟舖頭同我哋同事嘅支持同加油，多謝你哋。
我其實好同意依位客人提到話理念雖好但係亦要其他嘅配合。依個亦係自上年 Re Pillow Co. 唯一出路係要進入主流，沙灘嗰條片以來嘅體會。品質，門市服務，其他例如出貨速度及準確度、貨存管理、效率、售後服務（所以同 YKK 做了永久維修新床單拉鍊服務）、所有安排管理嘅可靠度，全部一一都好緊要。理念同產品都只係第一步，我哋其他嘢都要做好先可以進入主流。我今個星期咁啱同一位同事講，大部份人相信大公司多過小公司，唔係因為大公司啲產品特別好，係因為佢好穩定，你知你會拎到啲咩。例如 麥當努，佢漢堡包好好食咩？一定大家心中都有一間小店好食過佢，但係佢次次出品穩定。同埋次次我去到，佢都會有麥樂雞，一定有貨。但是，小店可以去到佢話今日無雞，雞賣哂。
我想做到我哋又好食又次次都有麥樂雞。咁當然依個亦都係最難。首先係個產品實際要真係得，然後再所有其他服務、管理、款式選擇，後續所有要得，唔好成日斷貨（PS. 頭盔：依家係做唔到的，我哋斷貨問題尤其熱門款係好嚴重，有啲排隊要等成個月，我都好頭痕，但改善中）—— 其實我仲有好多 product 嘢想做，但我現時必須要先將依啲事情處理好，客開心 。
因此最近其喺我係喺度整好個框架公司自己順暢運作，令我可騰出自己出嚟，咁我就可以再做新產品比大家，寧願行慢啲，但打好根基先，做好件事 。而用嘅方法係必須係出面不是用緊的，因為我越來越覺得，做事情往往如果當我哋去參考其他人嘅做法，往往已經係錯，其實好多事情都係咁樣，當個全個香港好興某一樣嘢或者唔興某一樣嘢，如果到時你跟就已經太遲 。例如說現時好興講AI咩咩咩，現在你去學習，然後去用同佢傾偈、GEN圖已經太遲，有時呢啲說話唔知點樣講，呢個有少少呼應返我喺第 #187 篇週記寫嘅，講覺得關於做產品必須要係要做創新嗰個，做領導市場嗰一個，係好辛苦，但係係唯一出路。同時間當然亦都要做返上面講嘅進入主流需要做到嘅嗰啲管理，唔係好多公司可以兩樣都做到，但呢個係生存嘅唯一方法 。而我覺得喺嗰個公司嘅管理方面或者整個公司本身嘅結構，營運模式方面，其實都係需要去諗一個更好嘅方法去做，不能夠跟人 。實在再講落去已經係有一啲秘密不能講，但我正喺呢方面努力中，雖然唔知得唔得，但盡力去做 。
#194 未進入主流、大公司的合作、管理問題是否應該請一個 Professional CEO（22/02/2026）