#207 身邊的人對你的重要（24/05/2026）

每一間公司背後其實都係人去營運，好多時我哋去睇人成功失敗我哋會花好多時間去分析佢哋做咗同無做嘅事，嘗試用 Reverse Engineering 嘅方法去想複製佢哋嘅成功/避免同樣嘅失敗。但其中一樣我比較少提及卻係非常重要嘅係你身邊嘅嗰一位。依一個係好多人都會忽略但係係極度重要嘅人物，你身邊嘅人係咩人同埋佢對你有咩態度同做法，係好直接影響你會否成功與否，更甚於可能你睇咩書，你做嘅一啲用人/管理/做事嘅決定。

先講我以下講嘅嘢係假設你有一個枕邊人，依個人係你男女朋友又好，老公老婆又好，佢大部份日子都會喺你身邊嘅，平時你工作以外嘅時間，好多時間都係同佢相處，依個人我必需要講係會係對你好大影響，負面嘅，我諗大家都諗到嘅啦，佢可能見到你未做得到有起色但佢亦唔清楚你做緊啲咩就叫你不如重新諗過，或者，可能要你做依樣嗰樣，將你嘅 Free Time 耗盡，令你無法做到自己，咁依個係負面嘅方面，大家都知若然依個係你枕邊人你都好難會成功，但相反呢？係我喺度唔洗想講你需要一個點樣好支持你嘅人，No。我喺度反而想講，其實最好搵到嘅人係，佢唔太理你做咩，對你無咩干預嘅人，依一種人係最好。如果你喺生活中，可以搵到一個唔干預你，平日放假你都可以自己繼續工作，而佢唔多理你搞咩嘅話，我覺得依個係最好嘅一類人。當然，唔同人同唔同人會有啲夾啲有啲唔夾，依個只係我自己嘅諗法同夾到我嘅相處方式。我近一兩年係比以前更加熱愛工作，我諗係可能有一啲好擔心或者好不安心嘅階段慢慢過咗或者個人已經適應咗，再加上 AI 及電腦嘅系統近一兩年嘅發展，我開始可以將某部份工作系統化去做，Off Hand 到，可個心同個人都投入多啲入工作，開始享受多咗個樂趣。有啲似學游水，開始時，你連浮起同游到都成問題，點可能享受到樂趣，唯獨開始上手了，就開始可以有啲樂趣。

關於身邊人，依個話題係敏感嘅，但我覺得係如果講真話，係不能忽視嘅一環。我老婆喺依方面佢有自己一套，佢基本上係去到我寫啲咩，做啲咩，佢都係界乎於知道同唔知道之間，好似依家咁，我自己夜晚一個人寫週記，佢會嗌入嚟問我做緊咩？然後我話「寫週記」佢就不會再問。有啲人覺得咁唔好，我卻係覺得，咁樣才是最好。