今個星期同咗一位朋友食飯，佢都係一位喺床品界嘅老友，喺個好幾間大型床品/床褥公司做一啲中層管理嘅角色，因為牽涉私隱同埋我想保護我朋友，太過個人同會比人估到佢係邊個嘅內容我就唔講啦，但不過有時大家傾吓工作，講下做緊嘅計劃同嚟緊做嘅嘢，其實都係相當好，有啲人覺得同行如敵國，我以前都覺得應該係，但慢慢唔係咁睇。可能好多人睇可能覺得對手就係對方，你賺多咗錢我就會少咗，但實情好多時你嘅對手唔係你見得到嘅同行，例如曾幾何時香港都有好多書局，書局當時可能會覺得其他書局就係佢嘅競爭對手，但係原來佢嘅真正競爭對手可能唔係書局，而係互聯網嘅資訊，好吸引嘅YouTube等等，根本唔係佢本身諗嘅嗰個對手。幾間書局互相鬥冚同埋討厭對方都係冇用，時代將佢哋沖散，消失於洪流之中。所以有時如果個諗法同競爭係仲係諗緊喺同一個圈入面可能是較為太過窄。如果睇得開依件事，我覺得其實好多嘢其實都係好閒嘅，成敗得失，誰人點樣點樣，一切都好閒。
我最近開始睇得到點解規模係重要，大家都知道一向以來我哋同「規模」係拉唔上啲咩關係，我哋都只係好小型嘅小公司，成日想進入主流但一直都唔太進入到，但慢慢做落，都確實越來越見規模係重要，因為有好多例如好似「Re 仔」咁，依個係我花咗好多時間去做的，而好多公司喺我哋規模係唔會搞依啲嘢，但我係真係好認真去做，同樣有啲更多係內部嘅系統，依啲系統整係整一次，之後基本上就會照用，如果會多啲生意會更加好啲，因為會抵啲，做一次，而可以使用量夠高。如果使用量唔高，咁就亦即付出好多，但收穫不多，咁就當然係無咁抵，我諗你明白。但關於依個規模，我個人覺得不是無限上升，越大越好的，去到咁上下就會OK，因為去到更大到某一程度就會是煩惱和問題又和付出不成正比，因此，係應該有一個 prime 嘅狀態喺一定規模是為最好。喺去到一定規模而又未去到太大時候，嗰個 prime 狀態係應該係可以按情況規模上升下降，大致嘅成本結構都可以按比例維持，咁就是一個我會覺得是一個「舒服位」。而我哋當然係未到，我依個叫做...... 「仍在努力位」。
又，最近收到香港電台一台《港識生活館》邀請訪問，訪問上星期啱啱分開三集播出，喺度分享下 。多謝幾位主持好識問問題，講咗好多之前訪問或者網上從來都冇講過嘅背後嘅事，包括我人生第一份工做便利店嘅經歷、以及一啲早幾年畢業時喺揀選進入法律界定做 Re Pillow 嘅爭札等，如果大家有興趣，可以喺以下 link 喺港台網站足本重溫 (為方便大家，亦可到 repillow.co/media ，亦會有齊三集節目連結可以click 到）
https://www.rthk.hk/radio/radio1/programme/yolo/episode/1096427
https://www.rthk.hk/radio/radio1/programme/yolo/episode/1096694
https://www.rthk.hk/radio/radio1/programme/yolo/episode/1096931
#205 與另一行業內最頂尖嘅公司產品開發部香港總管見面傾計（10/05/2026）