#068 冬天新產品、規模、工作和性格（17/09/2023）

圖：穿牌仔，唔知睇緊呢篇週記嘅你又有無做過？

Hello 大家好！歡迎大家又來到本週週記。咁呀今個星期，冬天嘅新產品樣板就已經做好出來啦，亦因為冬天就來到，所以呢同時都需要執倉騰出位置，詳情等我逐一喺本週周記度講。

1. 冬天產品樣辦

數返都係 7 月時候，當時呢就喺度準備緊一張冬天用嘅被，中間亦都涉及好多新嘗試， 今個星期終於做好一個接近完成品嘅樣辦。經一事長一智，依一張被今次我更仔細哋考慮同預備，唔會好似之前 Re Quilt 2 產品雖然係做得好，買咗嘅人都鍾意，但實在花費喺各枝節功能上面嘅時間實在太多， 而且枝節功能客人未必用到嗰種情況。 今次產品花費嘅時間同埋功能都係確確切切可以幫助到用家，而用家亦都會每日使用上面都可以受益到。另外，亦都吸收上次經驗，今次實際件貨做出來係9月底，遠遠早過冬季，唔會再錯過換季時間。呢兩點，大約半年前我於週記寫過會改善，必然會做返好，因此今次就做返好。

2. 執倉、搬貨

因為冬天要來了，所以今個星期真係喺廠度執清咗好多地方，掉咁啲唔要嘅垃圾， 有啲 sample 等等就送俾廠内同事，又或者拎返屋企用，亦都有一啲舊貨，安排緊會送俾社區組織，送比一啲低收入嘅家庭又或者有需要人士。呢啲搬貨執倉真係會令到自己好攰，不過都係需要做㗎喇，上年都冇執過，今年真係要執下啦。星期五執清晒之後，感覺真係好舒服。

3. 包裝、穿牌仔

因為本身負責包裝嘅同事，屋企人有事入咗醫院，唔能夠返工一段時間，以致呢令到公司嘅人手都幾短缺。所以近呢幾星期，我就負責包裝。好似今次週記嘅封面圖片，穿牌仔，唔知你又有冇做過？有時候係一間咁樣嘅小公司，就係咩都係幾個人處理晒，所以咩都要做。不過其實都幾好玩㗎，咩都可以做下，呢啲機會確實唔係度度有。

4. 我們的規模

其實好多人或許都對我們有誤會，覺得我哋規模應該都有咁上下，可以同其他床上用品品牌比較。事實上，其實走入我哋公司一睇，就會知道原來事實並非如此，可能你喺門市見到嘅同事，亦就係你聯絡 email 嘅同事，亦都係幫你打去速遞公司安排送貨嘅同事，亦都係負責試新產品嘅同事。好多可能同行，佢哋可能係國際企業，亦可能即使係本地公司都會有唔同同事有分工有分 Team，不過其實我哋呢個小規模都有小規模好，就係會親密好多同溫馨啲（好似係）。 喺定位上，我盡量希望我哋係可以同規模俾我哋大幾倍，有多啲人手，多啲資源嘅公司媲美，至少喺客人嘅心目中，佢唔會覺得我哋安排係寧舍唔專業，規模差人一大截。 儘管現實係我哋資源緊拙，但係都唔可以輸！例如我哋門市裝修雖然唔係話非常頂級，但係都唔算非常差，應該都算過得去，就係呢啲各樣嘅方面，我都想希望可以睇得齊。

比張圖大家睇下我公司個位：

 5. 工作和性格

呢一部份本來唔想寫。但喺星期六晚，自己一個留在公司做到晚上10點幾嘅時候，想抖一抖，當作 Bonus Content。

或許都係公開嘅事，我喺香港大學修讀政治及法律雙學士，讀書嘅時候總會諗，呢一切努力都會值得因為讀得好就可以入間 Top Law Firm，收入會好啲，日後人生可以易行少少。亦慶幸以頗佳成績大學畢業，又於畢業前搵到一間唔錯嘅 Law Firm ，可以出入中環置地返工，諗住之前努力終於可以有所回報，但原來有時人生就係咁，打算可以畢業休息下，卻自己決定去行一條唔同嘅路，早前嘅大學成績亦唔會幫到自己，最後人生亦無因為之前學業嘅努力或優異而易行咗。

以前當其他人去玩嘅時候，我嘅時間去咗讀書。喺努力埋首時我亦曾經諗，今日努力，日後搵到一份好工時，因為收入會好啲，到時就可以享受返，而且生活可以不必太介懷金錢，可以令身邊嘅人生活過得舒服啲、輕鬆一啲。

然而當然呢一切嘅一相情願，都因為自己嘅選擇，而無化成現實，至少現時吧，我對未來都係樂觀嘅。我信一個真係有實力同聰明嘅人，無論放佢在咩位置，或許需要時間，但佢會自有方法可以成功。

又，即使經歷以上一切，我亦感激父母培養，令我性格上唔係一個鍾意玩嘅人，其他人鍾意玩，但我卻會唔明白佢哋。反而我鍾意做嘢，我鍾意工作，呢樣可能令其他人唔明白，好似我好奇怪咁但確實我真係咁，所以好似依一刻星期六晚上11點，我仍獨自喺公司做嘢，呢個性格會令生活易過一啲。

公司望出去：正對面葵涌邨，左上角是華景山莊。