#069 新床單遇到的困難（已解決，但想和大家分享）（24/09/2023）
圖：今個星期其中有日去了門市看舖
大家好！又來到新一週週記，繼續來講講本週發展及最新產品動向。實情年底因為要預備冬天產品比較辛苦，而且畢竟可能初做生意，好多事情都唔識，近大半年都不斷有阻滯，不斷撞板，進度唔理想。但一直喺度努力克服一個又一個嘅困難時，好似新嘅困難又會出現，即如同行前一步之後又頂住咗前進嘅路，又要再沉住氣再去努力去爬過去。困難不斷出現。
而且因為蚊型公司，唔會有幾個同事同我「同一條 team」，因此問題只可以獨自面對解決，亦講唔到比家人朋友聽，因為實在佢哋亦都未必明白。有時尤其見到同齡一齊畢業同學，佢哋喺公司會有幾個男男女女差唔多年紀嘅夥伴一齊面對同分擔工作，會覺得份外孤單。我係一個好怕孤獨嘅人，奈何我似乎所行嘅路常常都好多時需要自己行，自己一個面對唔同問題。而且我明白做生意其實就係咁，所以都只係唯有默默努力，等做出一啲成績出嚟再講吧。
既然講到呢度，想以嚟緊新床單 Re Bedding 作為例子，講吓做產品時遇到嘅困難。呢個讀者或許需要少少對該產品嘅基本設計認識，我建議可以去週記 #066 睇睇嗰段短片，因為嗰段片內我 demo 了一個 prototype 設計。因為整件產品實在好多元件同範疇，難以逐一講，以下就集中只係講嗰個面布（Top Sheet）用料嘅選材料困難。
- 質感及舒適度：作為新床單的面布，亦即是每晚會貼住用家身體嘅布料，當然質感及舒適度係首要考慮因素。我回想返Re Pillow 開初之所以能夠吸引到一班用家非常喜歡而且會主動推薦其他人，亦都係因為質感舒適，無論故事講得幾動聽，請咩明星代言，都及唔上實實際際件產品好舒服。I think we can never forget that. 所以，舒適度喺做床上用品，必然行先。喺床單度，呢個代表柔軟、細滑，而且要適合喺香港大部分日子潮濕悶熱嘅氣候，所以要通爽透氣唔焗身，呢個非常重要。
- 布料結構及耐用度：緊接就係布料結構及耐用度。因為床單不如時裝，一般嚟講買咗唔會話用一季兩季就換，好多時都會用多幾年，因此床單布料嘅結構耐唔耐用就好重要。有啲布料可能摸上舒服，但洗多幾次就結構鬆哂甚或乎變形就唔得，其實呢樣嘢可能好多人都唔知道，但係現時市面上好多床單都有呢個情況，只不過結構鬆散、越洗越單薄未必咁容易睇得出來，再加上如果係變形情況，因為床單本身就係會笠住床褥，多餘布料會收喺床褥底，大部份人都唔會發現可能張床單越洗越大張（eg 200cm 長嘅床單布料結構鬆咗，長咗10cm，但因多餘布料收喺床褥底，大部份人都唔會發現）不過係我哋依個新床單設計就絕對唔容許呢樣嘢，首先第一係我對品質嘅要求，第二係我哋因為返設計上，新床單面布要同床褥表面尺寸一樣，唔會笠住床褥，因此尺寸要非常準，並且唔可以洗多兩次就鬆散大咗。喺尋找布料上面，呢個係有佢嘅困難，因為行內做床單嘅布洗水之後會鬆咗大咗都頗為常見，因為用家唔會發現。所以呢方面我哋落咗好多功夫搵合適嘅物料，同埋研究點樣真係做到面布用落可keep住尺寸準確。係好難因為從來冇人做床單要需要去到咁準確，我哋係第一個。
- 顏色及色牢度：物料清洗唔會甩色，而且顏色亦都可以染得好靚有光澤，而且色彩均勻準確，呢一切都非常重要。唔同嘅材料織布後，對於色彩上色個反應都唔同，而且唔同嘅染色方法，亦都會做出到唔同嘅效果。有啲靚啲有啲就差啲，當然成本亦都唔一樣，我眼見市面好多床單用耐咗確實好易洗到淡晒，而且啲染色都唔係做得好，新買返嚟嘅顏色過分地鮮艷，又唔靚，感覺染色印花工藝粗糙，咁呀，今次新床單當然要全部做好佢，靚靚仔仔，放喺屋企見朋友都唔失禮。
- 縮水率：呢一個同剛才講耐用度洗水越來越鬆越來越薄都有啲關係。新床單面布對尺寸要求非常準確，布料唔可以縮水，否則件事就係唔work。但係呢個又係市面上床單物料非常常見嘅問題，佢哋經過洗衣機清洗幾次之後，縮水率好多時都去到5%甚至更多，當然200cm嘅5%就只係10cm，多餘嘅布，因為會壓喺床褥下面，10cm 用家唔會發現。要搵到一隻布料可以做到縮水率喺5%以內係不容易，而且價錢都會昂貴，所以市面上基本上只有極貴價的床上用品組合先會咁樣做，當然我哋因為設計所需，都係要做到。去研究呢樣嘢嘅過程非常之唔簡單….. 現時我哋選擇嘅面布布料縮水率係可以做到3%以內。
以上講嘅依啲都係關於新床單嘅面布，當中或許大家都想像到我係不斷咁樣發現新問題去解決，而且要不斷咁樣同時去研究點樣可以做好，我以為一隻物料唔會越洗越鬆，點知花功夫研究哂顏色，如何使用之後，洗多幾次先發現佢尺寸會有改變，又要從頭來過，再研究為問題出自喺邊度，再改變方向，跌低起返身，再跌低又起返身。過程係好消磨意志。就係咁樣啦，有時做嘢就係咁樣㗎啦，大家都努力，今日就係講到咁多。
