圖：新床單側面的口袋，可以用來放手機、眼鏡等。留意我們不建議睡覺放手機在旁。手機應該關掉放客廳才對。好似係。
大家好，歡迎嚟到最新嘅週週記！今個星期主要做咗兩件事：1. Finalise 新床單最終樣辦 2. 捐被行動。
Finalise 新床單最終樣辦
喺開始之前我想講一講最近兩年，我覺得自己學得最多嘅嘢。
2022年，我學了係做營商基礎，要計算收入、計算各支出佔嘅比分、學習同商場同百貨公司交手、開舖頭、做裝修、定時要計算公司營運情況、將所有日常營運程序盡量變得順暢，確保有足夠資金出糧，學習平衡一門生意所有事情，所有都要穩穩定定，健康發展….. 以上都係我2022年學識嘅嘢。
而喺2023年呢大半年，當一切基礎都稍為定落嚟嘅時候，我學識得最多嘅係如何做一件產品，由原材料供應，到到製作成成品，中間牽涉好多事：各材料嘅品質管理、各個生產環節所需要嘅時間嘅管理、出問題時怎麼處理、生產流程困難點喺邊度、了解各個牽涉生產過程嘅持份者同埋合作夥伴佢哋最想要啲咩？佢哋有咩困難？我可以有啲乜嘢交換到俾佢。因為喺我達到我嘅目的嘅同時，如果我能夠知道對方嘅需要係啲咩，咁樣對整件事都會更加好。例如 Re Pillow 3 嘅面布布料（印有 RPC. 的該布料）係我哋同一間為於土耳其嘅世界一流布廠合作去生產，當中喺大家商討嘅時候，大家盡量配合對方需要。喺 Re Quilt 2 該次，我學識更多關於生產流程、時間管理、同埋如何可以做一件平衡各方面好產品。容我解釋：生產產品其實係一個平衡好多嘢嘅遊戲：產品質素、產品生產成本（會直接影響最後消費者需要付的價格）、產品功能、生產的困難程度、重覆生產的可行性…… 而呢一樣嘢係需要自己花時間摸索同研究。另外，設計上，要做好準備，設計要符合可實際作產品生產準備。因為做一件測試品容易，但要將呢件產品複製做一千份，都係咁樣嘅質素同標準，就需要有標準化流程同埋諗好整個生產過程如何可以更流暢。
今個星期去咗做新床單 Re Bedding 的最終樣辦，其實呢個就係測試自己今年究竟學識幾多嘅實戰機會。今次我覺得自己比起開初做嘅第一批 Re Quilt 2 進步咗好多，我對生產產品嘅認識深咗，而且我對各種布料、車縫技術認識亦多咗。
Super excited for this.
Preview一下一張圖片
The next generation of bedding.
捐被行動
圖：搬啲被上去，出哂汗，但都合照一幅留念。
今個星期我們亦去咗捐了一批約 70 張冬天厚被給工業福音團契（https://www.hkief.org.hk）。呢個機構會去一啲基層家庭做探訪，了解佢哋需要同埋派發物資比佢哋。冬天將至，都做少少事幫一幫人，雖然坦白講就唔係咩大數目，但都係叫做小小心意啦。決定唔好喺網站或者其他地方宣傳，就咁樣少少哋，放喺冇人睇嘅週記就可以了。
趣事一則：當日 Ben 都同我一齊搬上去，職員大概以為我哋兩個都只係搬貨工人，佢話會聯絡返 Re Pillow Co. 嘅阿 Ben 確認收到啲被，然後正喺度搬緊貨嘅阿 Ben 就好威咁講：「我就係阿 Ben。」
#069 新床單遇到的困難（已解決，但想和大家分享）（24/09/2023）
#071 給未來嘅我（08/10/2023）