#071 給未來嘅我（08/10/2023）

圖：星期三夜晚走嘅時候影的。好多夜晚自己一個好夜走，覺得自己唔夠好。

給未來嘅我：

我每一日都嘗試更加正面去面對每一件事情。我見到身邊其他同我差唔多畢業嘅朋友，好似慢慢都事業好過我，生活亦可穩定上軌道。而我似乎似一個小朋友仍在玩咩啲咩「創業遊戲」。我想可以比到好嘅生活身邊嘅人，我唔想要人唔知要等我幾耐。去到咁上下年紀，每一次我諗到呢度我都會難免懷疑自己行嘅路係咪正確。我想父母唔好擔心，想比到安全感同安穩嘅生活比佢哋，因為如果唔係父母，我亦唔可以喺世上。亦係當大個咗，到去到咁上下年紀，當自己開始會思考會否想有下一代時，先知道做父母有錢就可以，但要識得好好培養、教育下一代，做一對好好嘅父母，卻真係唔易。若然我有機會，都想可以傳到落去，希望可以教出一個善良、正直，而堅毅不屈嘅孩子。

昨日又聽到客人喜歡 Re Pillow 3 + Pro Add On 嘅說話，話好過之前啲枕頭好多，瞓咗無再頭痛頸痛，亦分享佢喺以往買枕頭嘅經歷，例如有個韓國枕頭頭兩日真係好好，但瞓一星期就扁，又有某啲知名牌子點樣完全唔得等，所以覺得我哋呢個好好。實在呢啲真人真事當佢親口同你電話上講，或者喺舖頭面對面講，而且仲要唔係一個半個，而係 Keep 住有，我難免會心軟覺得我唔可以就咁喺度放棄，但實在有時真係好困難。

未來嘅我，你可唔可以比啲肯定我，因為我真係覺得咁樣每日嘅生活有啲辛苦。我最近睇咗 Gary Vaynerchuk 嘅 Twelve and a Half 一書，佢提到自己喺接手父親嘅紅酒生意時，二十幾歲，同樣見到身邊朋友大家都搵錢多過佢，而自己卻喺度做呢個紅酒小生意，亦好氣餒。但慢慢做多十年，生意終於好，一切都變得值得，The rest is history。Gary 藉此勉勵創業或做生意尤其開初要有 Patience。我心入面知道我都可以做到的，只係我怕時間等唔到我。我會諗到底是否值得，因為理想，而犧牲同身邊嘅人平平淡淡安穩過日子嘅幸福。有時我真係好懷疑自己。

未來嘅我，我明白你無法比到答案我，所以我寫呢一封信比你，作為呢一刻嘅記錄，他日我可以返嚟睇返。希望到時，我都會如同 Gary 一樣，覺得一切困難嘅日子都值得。

梁禮恒

07/10/2023