#082 產品拍攝、Channel C 出片、朋友出書（24/12/2023）

圖：本週產品廣告拍攝現場

歡迎又來到本週週記！嚟到 2023 年年底，唔知睇緊嘅你今年過得好唔好，但辛苦咗一年，嚟到年尾，都要對自己好啲，努力時亦要注重休息，養足精神，嚟緊新一年又努力過。天氣寒冷，手指都唔係好靈活，我簡單寫一寫就好，因為真係想哩返埋喺張 Re Quilt Winter 2 度（真心好，唔係講笑，喺呢度我唔需要 Sell 你，因為呢個係我嘅小角落，同埋我諗睇得呢度嘅人都係想了解多啲 Re Pillow Co.，而唔係一般純粹想求其買件產品嘅人）

好，返返正題。

產品拍攝

今個星期一我哋約咗一名專業 Model/ KOL（應該係咁叫？）做一啲產品拍攝。一直以來 Re Pillow Co. 有一個問題就係基本上啲產品圖片好少，用嚟用去都係嗰幾張，而且個相片質素都係一般般。無他，因為所有產品相片都係我自己喺屋企用電話拍攝出嚟，首先一來器材已經輸比人，再加埋我自己嘅拍攝技巧又無咩，燈光亦都只係平時屋企家居照明，枱燈一類，出嚟效果真係差啲嘅。

因此今個星期我哋約咗一位專業 Model/ KOL 以及專業嘅拍攝團隊幫我哋影相，佢好好，因為佢係我哋其中一位同事嘅朋友，因此喺拍攝當中佢都幫我哋試咗好多唔同 Poses 同埋影咗好多唔同產品使用場景同方法。我哋都將我哋產品線嘅差唔多所有產品送哂比佢用，因為天氣都開始凍，同埋我相信啲產品真係要用過先可以的，否則有日有人問佢「你幫 Re Pillow Co. 影相代言，咁佢啲產品點呀」，令到佢答唔到就唔好。佢尤其對 Re Quilt Winter 2 同 Re Bedding 好讚賞，咁就真係好多謝佢了。

呢批相將會喺應該下星期/下下星期出。

Channel C 出片

早前（上月）我哋收到 YouTube Channel 「Channel C」邀請，話嚟緊佢哋會有個「聖誕食玩特輯」，透過 YouTube 介紹一啲本地小店比大家，形式類似係兩個女仔帶觀眾去香港唔同地方玩，問我哋有冇興趣參與，介紹一下我哋舖頭。當時一聽到會有女仔介紹，即刻有興趣，因為好似成日 Re Pillow Co. 都只係得我一個出鏡，好慘，有女仔可能會多人睇啲。因而答應。

呢條片剛剛亦於今個星期出咗，我哋喺最後 2 分鐘度：https://www.youtube.com/watch?v=X88Fvsr8pqU

朋友出書

朋友 Ringo Li 最近出了一本書「不要低頭，業績會掉下來」，內容主要講做生意要留意嘅一啲心法技巧。當然要買嚟支持下（絕對唔係因為自己有份寫序）

Ringo 係一個大我差唔多 20 年嘅人。佢畢業之後，試過打工，後來因為覺得唔啱自己決定自己創業，一創就創咗 20 年，做過好多唔同生意，近年以做 SEO（Search Engine Optimisation）比較出名。我係幾年前經一個朋友識咗佢，當時仍未有 Re Pillow。開初做 Re Pillow 之時，因為覺得佢係一個前輩應該行過我行緊嘅路，而通常我睇好多書都係咁寫「Find a mentor」，如果搵到人已經做過你做緊嘅事，可以指點你，你可以行少好多冤枉路，所以當時我都好冒昧咁問佢問題，而佢又真係答。因此就識咗佢。非常非常好人。

書入面嘅內容喺度就唔多講，個人認為喺依家太多太多「教人開網店」「教人做生意」「如何用網絡賺錢」等等嘅 Courses/書嘅情況下，Ringo 呢本書其實真係清泉。首先一頁頁都係好 Practical、好現實嘅例子，而且佢其實都係好想導人向正確方向去行。

如果一句講晒書入面想表達嘅道理，就係「成功無捷徑，嘗試多啲從用家/客戶角度出發，為佢行多步，對佢體貼啲，試吓做好啲，真正幫到佢嘅需要」咁你就可以賺到錢了。退一步咁諗，其實真係一啲好 Common Sense 嘅道理，亦係最真實的。我自己都係相信呢一套。

假設你搵到方法可以透過炒炒賣賣或者行灰色地帶欺騙人去賺錢，講真，呢啲錢都唔會長久，同埋你都心入面唔舒服，夜晚瞓唔安落（至少我係）。實實在在，做好自己，真正幫到人係最好，亦係可以最長久的。所以我覺得其實所謂成功其實無捷徑，都係一步步行出嚟。當然，因為實在太難，未必行到去可能已經陣亡，但都叫試咗吧。

今個星期就寫到呢度。天氣真係好凍，大家要小心保重。