#083 新一年、新年利是封（31/12/2023）

圖：製作中的新年利是封。非賣品。

又話咁快就一星期！今個星期可能因為星期一係12月25日聖誕，所以好似令到個星期短咗。

首先，今個星期又返返去做 product 嘅事，包括有做緊 Re Quilt 2（夏天及全年大部份日子適用嗰張）嘅新顏色同埋上年最好賣藍色嘅 restock，亦有安排做 Re Pillowcase 2 整返個 mini 版以及 XL 版，以及一啲暫時未可透露嘅下年新產品。開始感覺上，來年（2024）應該事情會比今年（2023）得心應手一啲，各樣事情感覺自己都多咗經驗，應該希望一切順利一啲，2023 實在好辛苦，過得都相當吃力。

不斷覺得喺度追趕，不斷覺得事情永遠做唔切，今年全年都過得吃力辛苦，直到年底11、12月，感覺先好一啲，開始感覺自己對事情有啲控制，開始能夠自己掌握工作節奏。我無法預測來年情況好壞，只能埋頭繼續去做。

最近與數位中學好友晚飯，席間幾位都談到工作上，總之有時做咗（留意，係「做咗」唔係「做好」）自己嗰 part，件事叫做搞掂咗就拋出去比第個，然後到收工講聲「Bye guys! See you next year」就掂，單嘢拋咗比人就唔再係自己跟，無需再操心。諗返實在喺 Re Pillow Co. 好難做到呢點，都係嗰幾個人，你唔做就無人做。幸好有時發現到啲同事處事都好為公司著想，雖然我唔會特登講，但其實自己心中有數都好安慰同慶幸的。當然，聽到中學好友咁講，難免都有羨慕。收入優厚穩定，亦無需為公司前景苦惱。我好想唔單止做好 Re Pillow Co.，更想可以當 Re Pillow Co. 做得好時，幫助家族生意「惠記」做得更好，我知道需要時間，要做好要改變現狀要時間，不能急進。希望做到吧。

入返正題。

新年利是封

一直好想設計利是封，最近年尾有啲手痕，因此今年決定付諸實行。

Preview 一張相比大家睇：

呢個到到2024年時，會再公開宣布。

又，新一年了，祝大家新年進步，身體健康。應承大家，我必然會努力。