#084 神秘的物理治療師、展望 2024（07/01/2024）

歡迎來到本週週記，雖然唔知道有邊個會睇，但如果你喺度睇緊，感謝你。每一個星期我寫一篇短短嘅週記，其實並無諗會有咩人睇，只係或許係一啲紀錄，一啲個人舒發。大家生活各有各忙，多謝你花時間睇一個陌生人寫自己做生意嘅起跌。
即刻返返嚟本星期 Topic！今個星期做咗啲咩。

神秘的物理治療師

今個星期有兩日分別去咗尖沙咀 iSQUARE 以及北角港運城看舖。最近多咗一啲第一次認識品牌嘅朋友來訪，有啲係上網認識，有啲係朋友介紹，亦有啲係自己嘅物理治療師介紹。講到物理治療師，就必須講一講「神秘物理治療師」。其實過去一年都有唔同物理治療師接觸過我哋，認為用過我哋枕頭覺得好用，因而想以批發價去購入枕頭放診所去賣比佢哋嘅客人。呢啲一向我哋都配合去做的，幫到人就好。但近來我哋發現有一個「神秘物理治療師」係從未接觸過我哋，但卻常常暗中推薦佢嘅客戶嚟買枕頭，我哋開頭都不以為意，因為有人來推薦介紹其實都常見，但呢件事特別之處係耐不久又有一個，耐不久又有一個，大家都話係物理治療師推薦，令到我懷疑呢個是否同一人。初步經我哋問啲客，應該有兩三個「神秘物理治療師」經常暗中推薦自己客戶嚟買枕頭。雖然唔知你係邊個，我想喺度多謝你，因為對我嚟講，都算係對我工作嘅肯定。亦都想喺度多謝埋其他曾經推薦朋友親人嘅你，以及其他一直支持我哋嘅物理治療師、康復中心、中醫診所等等。
Thank You.

展望 2024

2023 係一個建立咗好多新產品基礎嘅一年，包括例如喺枕頭方面，我哋開始可以單獨購買 Refill Pack，希望令到大家可以用耐咗可以換芯繼續再用落去，唔洗整個枕頭買過，更加慳錢環保，亦係我心目中好耐之前已想做到嘅「永續 Re Pillow 計劃」。

被子方面，喺 Re Quilt 2 推出時，我乘機建立咗一套「開鈕門 + 工字鈕」加厚系統，當時推出時無人覺得係啲咩，但及後喺 Re Fleece 絨毛被同 Re Quilt Winter 2 冬天厚被度同樣採納咗呢套系統，令到所有被都可以加厚，整件事就變得合理，因為被子可以自由配搭加厚，變咗其實冬天可以買少張超厚一年用到幾日嘅被，亦可有更多厚度嘅 Combination 配合唔同氣溫環境。

去到 Re Bedding 新床單，亦係我今年 2024 希望特別推動嘅產品，其實設計亦都係建立一套系統，作為未來發展基礎。

2023 年誠如上週週記所及，過得好辛苦，但我是不會放棄亦不會「希望」日子會過得舒服一點的 ，辛苦是必經的。因為實在不想被一些有不良意圖的人來知道我下年的動向，因此在此就不仔細講 2024 計劃。 

建基於 2023 年定下嘅基礎，今年相信可以繼續向前發展落去。