#085 International Shipping、Queen Size 新床單、零售市道（14/01/2024）

圖：有日看舖後，晚上 8 點收舖再回公司做嘢，很青春。

歡迎大家來到新一週週記！又由我嚟寫一寫本週工作 Updates。

International Shipping

今個星期首先第一件事就係我哋開始嘗試將產品寄去外國。呢度或容我解釋一下背景：自 Re Pillow 開初早期我已提供國際送貨（International Shipping）服務，不過一直以來都係基本上經香港郵政/順豐速遞去做，因此嗰個送貨時間會長而且成本亦都頗高，由幾百至上千不等，而視乎目的地，我們會收會客人運費$300-600左右，呢個確實有啲無辦法的，因為產品實在本身體積大，寄出運費已好高，做嚟其實亦唔 expect 好多居於外國嘅人會用，純粹只係叫做有呢個服務，假設有人需要，真係想寄去外國我哋都叫做可配合咁解。

但一直如果有留意網站，其實碌到底部有幾隻細字「由葵涌走向世界」。當然或多或少呢句有少少自嘲意味、不過亦係表達緊其實都有想希望有日可以走出國際。因此剛剛過去嘅星期日起，我哋想試行一件事 —- 我計算過可透過使用一流國際速遞公司，例如 FedEx、UPS 等、或許可以更快和更合理成本寄貨去外國，從而令我可以改改網站國際運輸政策，做到全球購買滿一定金額可以免運費。詳情呢度唔寫了，但可以參考返網站頂部 Menu 有個叫「News」一欄，Click 入去，可見到我寫了一個少少消息發佈以及拍咗一段短片講解。

不過呢個運輸政策實際執行上得唔得，或者成本會唔會計算唔嚟暫時我都唔知，因此都係一路做一路試。我唔知道你幾時睇呢篇週記，可能你睇嘅時候呢個全球免運費計畫已經因為蝕大錢而取消咗….. 希望唔會吧

Queen Size 新床單

一直以來都有收到客人希望將新床單擴展到 Queen Size 以及其他 size，例如4尺x 6尺3一類。因此過去幾個月就在準備4款。但因為中途要做冬天被，以致進度有延遲。今個星期初，產品終於做好，4款新尺寸將於下星期三（17/1）登場。

零售市道

2024 話咁快就已過咗兩星期。確實現時可能因為我悲觀，香港消費（零售、餐飲）市道真係麻麻。我哋雖然產品有自己獨特之處亦可幫人解決實際問題，都相對會較為好一啲，但其實亦作為零售業一份子，或多或少會受影響。平心而論，香港股市樓市氣氛差，社會對前景有擔心，或多或少影響整體普通市民消費意欲，牽連各行各業。我哋呢啲小生意小人物做唔到咩事，只好做好自己了。