#086 BLACKOUT SALE 及利是封（21/01/2024）

圖：新床單 Top Sheet 新包裝，小 detail 位就係盒封口用咗圓形透明膠紙，以往從未試過，感覺更 Pro。

歡迎大家來到本週週記，今個星期最大件事就係我哋由星期四開始一連五日嘅 BLACKOUT SALE，其實做一個類似「年度大減價」嘅活動呢個概念我有咗好耐，早於 2021 年 10 月，亦即 Re Pillow Co. 一週年時已經想咁做，當時諗嘅係「Re Pillow Co. Turns ONE 之 Birthday Sale」，不過唔記得係當時應該因為成個 Re Pillow Co. 都係我「一人公司」，要讀書又加要兼顧 Re Pillow 日常工作，應該又係逼到 miss 咗 10 月一週年時間，因此就無做。去到 2022 年 10 月，當時就應該係忙住要搞尖沙咀iSQUARE 店嘅裝修開幕再兼顧日常工作結果又 miss 咗。去到 2023 年 10 月，就忙處理去到最後最後大直路準備要推出嘅 Re Bedding 新床單嘅最後事宜，雖然兼顧到，但亦覺得唔想一堆事情堆埋同一時期進行：又新產品又大SALE，可能會令大家無所適從，因此決定都係唔好住，並且定好就大約喺 1 月，農曆新年之前去做，等大家可以買嚟不論自用定送禮，可以新年前有得用。

如果有閱讀開我週記（或者即使係新讀者也好）嘅你，都知呢個週記真係好多時係我寫比自己，作一啲記錄，或者講直啲，就係少少自己經營壓力大，情緒抒發、自我排解嘅渠道吧，從來不帶任何商業成份的。不過如果你喺得呢一度睇緊，我都會建議你可以考慮會唔會襯 BLACKOUT SALE 買啲嘢比自己/身邊嘅人，真心嘅。因為你可以Mon住未來嘅價錢，呢個會係全年最抵嘅價錢，我唔會呃你，亦都真係少少半推廣形式咁樣去做呢個價錢。可能襯依家買啲嚟送比人/自用都好。

好喇，唔再講了，免得比人話賣廣告咁！呢啲自己決定吧。

其實做呢個 BLACKOUT SALE 嘅原因我都想講下，但我覺得呢個最好都係拍片咁講，我亦都想組織下自己啲諗法先講。可能睇吓會否下星期拍一條片講講，到時再夾埋 attach 喺下篇週記。

轉一轉話題：想講早前就提過會整一款新年利是封（週記 #083 內有圖）。最近整好咗，非常靚，喺未對外公開同安排點樣送比其他客人之前，想送比有睇週記嘅你。縱然你我未曾相會，甚至互不相識，可能呢篇係你睇過唯一一篇週記，又或許你由第一篇週記 #001 「最近我發現買開件 T-shirt quality 差咗」開始，85篇，篇篇睇哂，感謝你一直嘅陪伴。

因此為表謝意，我亦希望能夠免費送一套呢個自己設計嘅利是封比你，你只要喺呢篇週記出咗一個星期內，經以下呢條 link，會去到呢個「利是封 Product Page」，就會見到一件 $0 利是封嘅產品，你可以去買咗佢，因為 $0 所以落單時係唔使信用卡資料唔洗比錢，我會幫你郵寄出去比你，郵費我會比。先要講明：因為我會用郵局寄，因此唔可以寄去「順豐站」、「智能櫃」等，寄去香港嘅住宅/公司地址先可以。

link：https://repillow.co/products/2024-cny

（PS 如果已經買唔到，就代表 quota 已滿/太遲了，抱歉，不過未來兩星期密切留意 Facebook/ Instagram，到時我會再送比其他客人，你可以到時參加）

今個星期就寫到呢度。