#087 新年利是封(27/01/2024)

#087 新年利是封(27/01/2024)

圖:呢個真係確實係我個位,好多人以為 Re Pillow Co. 一定好 Glamourous,但現實其實就係咁......

歡迎大家又來到本週週記,又由我來講講今個星期的工作。今個星期首先就先處理所有週末的 BLACKOUT SALE 訂單,然後就立即去準備利是封(https://repillow.co/CNY)。利是封是需要準備的,因為為咗避免喺運輸期間壓爛啲利是封盒,印刷廠並唔會將個盒摺好埋,因此當處理完訂單寄貨,我就去了摺盒。然後摺了一兩日,就開始拍片去介紹呢個利是封計劃,拍攝咗兩段片,喺度亦都 Attach 比大家:

 

 

拍了片之後,就要準備網頁(https://repillow.co/CNY)去讓人可以登記,我將所有詳情都寫在一頁,將開箱介紹嘅片段加埋入去,再準備到時開始 Sign Up 時嘅介面。Set 好 10 點公開,完成!

星期五晚,整個登記過程都好順暢,100 份網上登記利是封在兩分鐘內清哂,比想像中更好,真係感謝各位支持。

最近或許因為經濟不景氣,可能有時上網都會見到一啲店舖會話無生意之類,明白的,畢竟我哋大家不論係從商或者打工,都會知道近日確實經濟唔好。但有時我唔太鍾意一啲咩生意難做說話,咁難做就唔好做吧,無人強迫你的,同埋去埋怨「生意難做」並唔能夠解決問題,要解決問題都係需要諗方法,與其將時間花在擔心、壓力之上,不如努力諗諗有無方法可以改善情況,咁樣會對整件事有幫助。

PS. 上星期週記提到可能想拍一段片講講為何要做 BLACKOUT SALE,但最後我覺得講經營其實對客人好似無甚麼好處,亦非客人想看到的,有時間不如想想如何多推廣出去吧。

今個星期六亦因為一啲臨時意外,同事突然不能開舖,因此我就臨時去看舖,亦有在社交平台立即 UPDATE。臨時一日星期六看舖,雖然有啲措手不及,但都係好事嘅,可以多接觸唔同人,對於了解發展方向,了解客人需要,亦有幫助。

今個星期就寫到呢度,感謝大家支持!下週再見!