#088 國際送貨大笨蛋！（04/02/2024）

圖：真實數張國際訂單合共的運費

歡迎嚟到今個星期嘅週記！ 如果留意我哋早前週記 #085（按此進入）， 或許會知道我哋自從一月中開始提供只要買滿指定金額（大部份歐美地區是HKD1200），就提供免費國際送貨服務，當時我更認為是實踐我們「由葵涌走向世界」 的重要一步。

然而兩星期過去，收到了一啲國際訂單，亦都收到了一些國際運費的收據，我就發現自己成為了「大笨蛋」， 因為國際送貨費用價錢超過我初初計算，初步睇開頭呢兩星期嘅國際單都係蝕做。但係遇到呢啲問題我哋唔應該去逃避，可能有啲人會覺得不如就直接 cut 咗唔收國際訂單，但係我唔係咁睇。

我覺得如果要真係跳出自己嘅框架同埋格局， 我哋要係諗辦法去解決佢，而唔係去逃避佢。世界好大，唔應該因為一個問題已停咗喺度，Re Pillow Co. 需要望遠，要有國際視野。係，我哋規模好細，無咩人會喺外國想買我哋嘅 Products，但我哋應該做嘅係要 Future-Proof 自己。諗好同計算好一個可行嘅國際運輸方法係不需要額外經濟成本的，只係需要一啲腦筋同時間同精神去做去研究。Be a visionary. 因而喺呢個星期，我就去研究每間國際速遞公司嘅計費方法（呢啲都係公開資料，網上找到），體積重量包裝目的地等會點樣影響實際成本。我初步暫時覺得國際運費高嘅問題係源於產品連同包裝體積較大所致，當要幾件產品包成一箱出貨時，更會有「盒中盒」情況，以致整件貨物體積更大，不利運輸，亦都好唔環保。因此知道呢一點之後，我立即修改了網站「送貨服務」一頁（按此進入），在國際運輸一欄加了一句：「亞洲以外的所有國家：為了節省能源浪費和運費，我們會使用較為輕便的包裝，盡量避免盒中盒等情況。」相信這樣可以解決一啲國際送貨問題。今後起，我亦會視每一張收到嘅國際訂單為一個練習，練習如何可以造出體積更有效率嘅包裝去真正由葵涌走向世界。