#124 地圖床單、同事聚會、神秘產品、宏觀經濟（13/10/2024）

Hello 大家好，歡迎大家嚟到本週嘅週記，咁今個星期都有幾樣嘢想講

首先第一樣地圖床單已在製作中，所有以前嘅問題應該已經解決，如果順利的話，今個月月底就可以推出！希望一切順利啦

其次，就係關於今個星期我哋有一個小型嘅同事聚會。話說有日收舖後，我叫哂三間門市所有全職兼職同事，同佢哋講是要晚上返嚟公司開會及培訓，實情係我準備咗一個小 Surprise，喺公司一齊打邊爐。有時做生意唔係下下要講點樣搵錢嘅，咁樣開開心心一晚都幾好。有機會的話，日後要再搞多啲。無論生意好唔好，都要有時聚吓嘅。

喺嗰晚嘅打邊爐，其中一樣我最大嘅收穫就係同事同我講，你真係唔好成日在Facebook亂寫嘢，好似個地圖床單，喺六月嘅時候我喺網上 Facebook 忍唔住公開咗，搞到令到好多客人都話等埋先，又或者問幾時有幾時出，但係實情我又冇推出時間表，令到同事有啲難做。

完全明白，因此我現在都要避免咁樣，在Facebook亂講嘢了，產品要真係好去到確認知道推出時間表先後post出來，確實係比較好。

因此現在我只能夠講就係嚟緊年底之前會有一個神秘產品，已經籌備了一段相當長的時間，相信年底會推出，詳情不公開。

因為從商日子甚短，一直不知道關於宏觀經濟對自己的影響。如果我自己唔認識唔清楚嘅東西，我都唔會講，因為自己唔清楚，就不便評論。但隨着開始慢慢經營日子耐咗，雖然講唔出實際數字，但係如人飲水冷暖自知，慢慢會開始有啲感應，開始會feel到經營上有啲咩日子係順啲咩日子係逆一啲，然後亦會開始慢慢睇到同宏觀經濟嘅關係。無可否認，香港現時嘅市場係進入一個淘汰嘅時期，承認又好唔承認又好，喜歡又好唔喜歡都好，始終現時確實宏觀嘅經濟唔係好，因此零售同埋飲食都係真係差啲。

慢慢慢慢，我都開始feel到，原來真係會有影響。我同事講話恆指升嗰幾日係生意係會好啲，然後都會跌翻落嚟嘅時候，生意即刻跌。我心諗有冇咁快反應，但係反正佢就係咁講啦…… 不過又好似真係。

然後見到結業潮好似似乎仍未停，其實結業這件事都講咗一年多，我知道仍然有好多人一齊仍在頂住。我個人偏向覺得有時候不能夠死頂，唔得就要放手，將來有了經驗再嚟過。死啦搞到好似自己同自己講咁，不過係真嘅。