#128 地圖床單終於出（10/11/2024）

地圖床單講咗半年，剛剛今個星期終於推出。關於床單嘅細節，可以睇：https://repillow.co/maps 一頁，因此喺度我就唔在此介紹喇，不過唔係賣花讚花香，真心真係做得靚，作為一個特別版 Top Sheet，總算可以還自己一個心願，亦都年底之前終於出到，可以亦都令到大家有新款式新床單可以過聖誕。

上年 11 月，首次推出新床單時，我哋只有淨色，原因很多但我可以稍為講下：首先從策略上，以我們依啲開始做嘅時候，如果做淨色床單會比較容易起步一啲，因為款式上面會比較容易大部份人接受得到 ——— 如果做花款的話，實在「各花入各眼」，比較難確保款式可以迎合到唔同人。我當然明白淨色有啲人會覺得太單調，不過無可否認嘅始終佢比起花款會更加容易叫做「可以接受」「OK LA 可以用住先」，例如一啲灰色、米色、綠色、淺藍色，大眾都會接受。咁樣比較容易令到我哋可以實行試「新床單」嘅依個「用拉鍊換床單」嘅概念。畢竟返番上年呢一個時間剛剛推出「新床單」嘅時候，我知道依家講轉頭就覺得好容易可以「馬後炮」，但係當時真係好擔心會產品唔受歡迎，而且當時嘅生意真係唔好，如果呢一步行錯嘅話，好可能就捱唔到落去。「新床單」係喺依個背景底下去推出的，開頭六個顏色，四個尺碼，咁樣開始做。

一開頭出新床單嘅時候已經收到有客人會話點解冇花款、點解得淨色咁單調、可唔可以有卡通、點解你唔做Chiikawa、你可唔可以同迪士尼合作出卡通、你啲淨色好核突，出啲花紋得唔得…… 如此種種，我當然聽到亦都放在心中，但當時我處於有限嘅資源底下要嘗試去試依個「新床單」concept，公司生死未卜，只可咁樣開始先。

因此從商變為了一個痛苦的過程，要學識承受中間轉折過渡的時候，承受有時現實未必能如自己心中所想一樣，我理想中，我對於新床單有很多美好的願景，但夢想和願景雖好，現實我需要時間，慢慢去儲一批新床單的用家，去將這些一步一步實現。

即使去到今日，慶幸新床單能有用家歡迎和厚愛，但它仍然是處於起步階段，前景仍然未明，世界嘅殘酷係冇人會因為你做得辛苦而同情你，優勝劣敗，呢個就係現實亦都係世界就係咁，不應該投訴亦都冇嘢好埋怨，因此還需繼續努力。