#132 貨存遊戲、分配工作予同事和工作實況、談工作

做產品係一個 manage 貨存遊戲。以往 Re Pillow Co. 有一段長時間基本上只係有「Pillow」即枕頭依一件產品，最多可能有個 mini 亦有個 XL，都係 3 款產品。再加少許被和枕頭套都係兼住做而非主要產品，因此有一段長時間貨存管理並非一個困難及需要諗嘅點。出新床單開初，只有4種尺寸，6個顏色，依個都仍未係一個困難點。缺貨就補就好，都唔係太多花款亦未去到會感覺情況無法控制。但自從慢慢款式開始多，好似依家不同質地款式去到 20 款床面，再乘以 13 尺寸，太多款產品開始喺管理上要做得仔細啲。唔怕亦講講其實一直以來電腦/online store inventory 全部都係寫寫 99999，無貨時就會人手輸入 -1，然後做好貨就改返佢做99999，每樣產品都係咁，由幾年前到依家都係咁。一直無事由自可，當產品越來越多，再加現時有3間門市，其實咁樣寫法係你無法去預估嚟緊咩貨會斷，咩貨係太多。以往 Work 嘅方法並不代表現在 Work，現在 Work 亦不代表日後 Work。從來工作或生活是要不斷改變，因此今個星期，試行電腦化貨存管理。先有咗第一步：貨存有入機，睇到數字啦，先有第二步點樣去「管理」。希望得啦。

分配工作予同事和工作實況

今個星期負責管理門市事宜的同事主動來葵涌找我相談店舖事宜，並再和其他同事開會傾談，主動協助分輕葵涌總部的工作（亦即係，我的工作），實在會有幫助。確實過去兩年半（22年中我畢業起計），隨著產品數量和本身複雜度越來越高，工作只是越來越多，有時我都會有好攰的時候 --- 例如今個星期六因為有啲事，要晚上10點幾返去葵涌公司做一啲事，第二朝亦要早啲出動做啲嘢再返公司，然後全個星期。老實講無人會想一個好地地嘅 Weekend 要返公司。無人會想咁樣突然之間要將 Plan 好咗嘅週末活動取消，然後返公司工作，但工作就係咁做嘢就係咁。我亦都明白依個並非會話可以避免，喺唔同階段都會有依啲情況，只有自己心理上調節。

關於工作

講開有啲興起，講下多啲嘢。我諗好多人都聽過一個叫「今日辛苦啲，之後條路會行得舒服啲」嘅道理，最原版依句嘅解釋係咁嘅：你依一刻努力做多啲嘢，工作或讀書辛苦啲，咁樣你考試考得好（例如），會可以入到更好嘅學校，群到啲更加好嘅人，之後行出嚟搵工也好，個人嘅修養學歷知識也好，都會可以更上一層次，行出嚟條路係會好咗，咁日後生活會舒服啲。另一個例子係在職場上，今日辛苦啲，可能你做嘢做得比人好，行多一兩步，或者攬多啲嘢上身做，老細見到你工作掂喎，自然擺在心上，唔洗好人好多，可能只係好人一個馬鼻，咁第日有咩機會都交比你先，拿，可能係真係依刻會因為咁，你辛苦過同多嘢做過其他人好多㗎，但係當時機來到，佢要比升職也好，調位也好，都比你先。喺我自己從商上，雖然我都唔知係唔係，但我亦相信同一個道理係 Apply 到的，今日辛苦啲，但為公司開咗個好啲嘅頭，之後希望可以越做越順暢慢慢上軌道唔洗我咁樣做到，其實我依家係中午12點幾，但我真係好想瞓覺。

我對於依個道理係有一個個人延伸嘅解釋嘅，除咗上述嘅原因外，其實工作嘅辛苦同困難我覺得係一個好主觀嘅標準。所謂嘅「辛苦」佢實際意思係「對於依刻嘅我有啲辛苦」，而可能對於其他人是不辛苦的。亦都留意我講嘅係對於「依刻嘅我」辛苦，即，未來可能對於未來嘅我係唔辛苦的。我認為辛苦同困難是好主觀的，係可以改變的。我比一比個實際例子你。以往我有時亦會需要搬一搬貨，但人熨床上用品，其實啲枕頭被都又大件又重，但因為我係會健身，做一啲舉重運動已多年。而我亦喺依段時間同時留意到當我更大隻健碩的話，搬貨的時候就會覺得貨品無咁重。重量從來無變過，變嘅係自己嘅能力，其實是一個非常簡單道理。因此衍生另一個我自己嘅睇法係困難之所以係困難，係因為「依一刻」嘅自己唔夠叻唔夠勁。只要自己更強，咁同一個環境情況，亦不會是問題了。

有朋友常常講笑說我是 Mr. Lai（黎生），即在電視訪問話「我嘅訴求就係想返工」嗰位，話我是工作狂，為工作賣命，星期六日都會掉低本身計劃去工作。但我覺得依個係無可避免的，尤其於年輕時，難免要係咁。