#138 苦惱（26/01/2025）

諗咗好耐應唔應該寫這些出來，因為好似比較貼身一啲，我怕寫出來會有負面影響，但係週記係一個誠實而坦白嘅紀錄，我唔想將佢成為好似吹水大會，因此都係決定寫出來。最近開始遇到一啲公司管理上嘅問題。始終有不同嘅人會有不同嘅長短處，有時如果同事喺工作上未必做得足夠好，其實我都好苦惱應該如何去解決問題 。當然有啲人就一定會話，提醒幾次，如不改善，直接將佢解僱就可以。但我有時再想，當然希望係可以不用去到這一步。我信我公司嘅同事都係真心係想為公司，為客人好，我亦都唔信有啲人係特登想做差啲，然後想公司特登帶來一啲負面嘅問題等我去苦惱或者要諗辦法如何去解決…… 我係真心覺得我哋公司同事都係善良嘅人，但唯獨是如果真係表現未夠理想應該如何處理，我係有苦惱的 。

當然提醒之後，如果同事能夠自我修正就最好，亦都事實上好多情況其實都可以！好多人性格或者長短處覺得係生成，覺得係三歲定八十，係無法改變 。而如果事實上去睇世界身邊嘅人（大家都係成年人，我講多少少） ，好多人所謂會改，但係其實實際係都改唔到。就好似一啲夫婦或者情侶之間，如果有一啲磨擦衝突，其中一方話之後會改，大部份情況都係改唔到的 。

但事實上最近越來越多研究發現其實呢個唔係真理嘅全部 ，冇錯，確實「大部份人」冇辦法會改變到自己嘅性格同埋長短處，但係依啲通常係一啲比較「蠢啲唔叻嘅人」，佢哋嘅潛意識上面覺得自己嘅長短處同埋性格係咁就係咁（其實好蠢），即使佢哋本身身體有能力去改變自己，佢哋嘅性格同埋大腦會叫佢哋唔好改變，繼續咁樣 ，因為依個係「我」，佢將佢嘅對於自己嘅「個人認知」，建構咗喺以往過去嘅自己上 ，而整個過程佢哋係不知道的，潛意識幫佢做晒一切 。因此即使佢無論點樣去努力去改變自己，都冇辦法成功改變，過一段時間又返番以前嘅自己 。

佢哋係可以係真心努力去改變自己，但係係改唔到的 。原因係佢沒有改變自己根本嘅邏輯同性格，佢仍然覺得自己係以前嘅自己 。如果要真正生命有改變，需要嘅係佢哋重新去改變自己嘅生活習慣同埋模式，例如以往我不會 XXXXX 的，今日我突然間會，並且強迫自己去做這個改變 。做多兩做，慢慢整體整個性格都會改變，其實佢哋係做到的，只係以往性格限制了自己 。再舉一個比較遠啲嘅例，有啲人天生會畏高，其實佢哋身體上係不畏高的，佢嘅身體同其他不畏高嘅人嘅身體係一樣，大家都可以喺高空漫步，只係畏高嘅人潛意識同自己講自己係一個畏高嘅人，因此除非佢改變咗自己潛意識嘅性格嘅限制，否則無論佢點樣去努力去嘗試喺空中高空漫步，佢係無法去做的，即管佢真係用盡百分百嘅努力去做，都係會做唔到 。

講得有啲遠咗，但我諗大家明白我意思 。因此我希望提醒同事真係可以做到依個效果，能夠從根源嘗試改變，但係我係苦惱的，因為我唔想話人，唔敢話人，亦都唔識話人。但只有每一個人都成長，Re Pillow 先可以成長，只得我自己一個努力是唔足夠的。

不過一如我早前其他遇過嘅問題，好多時候慢慢一路行住就會事情會迎刃而解，若然太過急於要需要依一刻要諗一個辦法去解決，反而未必解決到 。