萬變的營商環境
最近確實營商環境真的不斷轉變,不單止是我們床上用品行業,各個行業經營越見挑戰 。有些朋友是主要做美國生意,最近因為特朗普上場後加徵關稅,會改變他的整個成本結構,突然令他要急急想辦法應對 。另外有些床褥的行家也因移民潮、樓市淡靜、宏觀經濟不佳而生意大跌,如此種種的故事,比比皆是 —— 一切來得太快太急,難以適從 。似乎沒有人有一個完美的解決辦法,但大家都要在這個環境下求存 。因此最近開始覺得其實如公司能夠做到數十年,其實不容易 。不論做得是否成功,是否知名,但能夠捱到數十年未有結業,已是一大成就。如果係做得好的話,則更加厲害 。
亦都開始多咗個睇法,係不論是打工還是做小老闆,其實以上嘅呢啲所有都同每一個人息息相關 。哪怕是做政府工,如果宏觀嘅經濟出邊市況唔好,雖然對公務員影響開頭可能未必見到,但若然情況持續,也都會影響到公務員嘅工作同埋生計 。社會若然要向前發展,沒有人能夠完全獨善其身,總會或多或少受住大環境影響 。
講到呢度就諗起以前還在讀書的時候,因為當時畢業之後都打算找一份穩定嘅工作(係㗎,我本身冇諗住做床上用品的),當時見工嘅時候一定會問你一啲時事同埋一啲經濟大環境嘅問題,所謂要問你有冇 business sense & market awareness,諗起之前好似只係答到一啲好膚淺同埋不深入獨到嘅見解,不禁都覺得好笑 。不過,呢啲見解我覺得係需要真係喺市場上工作,而且要慢慢有一定嘅經歷情況底下先會明白同體會的,一個廿歲出頭嘅畢業生,係答唔到的 。
見得更多人
最近因為工作嘅原因,認識到不同行業嘅朋友,大家都係純粹識個朋友傾偈,雖然其他人都係分享自己嘅經歷,由於行業唔同,所有嘢未必係完全套用到在自己的工作上,但係中間嘅一啲道理都係互通嘅 。喺同佢哋傾偈後,其實返到屋企自己再諗吓,有好多可能即將要做錯嘅決定,係可以避免 。同埋有時候見到人哋嘅經歷,犯咗嘅錯誤,或者遇到嘅問題,其實都係可以避免 。又或者到返轉有時候其他人問我嘅問題,因為我以前曾經遇過,因此亦都可能幫到佢哋解決到問題 。有時解決問題,可能係我介紹一個朋友/合適嘅人俾佢,佢可能煩惱咗幾個月嘅問題就迎刃而解 。無可否認,古人話:獨學而無友,則孤陋而寡聞,或者都有幾分道理 。
由於自己比較年輕,好多時見到其他人都係大過我嘅叔叔前輩,去睇唔同人嘅經歷同埋同佢哋傾偈,會慢慢睇到一啲道理,同埋知道應該點樣做會可以行少啲錯嘅路 。
在變化中該如何自處?
以往有不少人成功嘅方程式,喺今日香港未必能夠再行得通 —— 原因係香港本身嘅政局和經濟格局都有改變,亦都人口的構成亦都不同了,各行各業也有洗牌。在如此嘅變化之中,我覺得很難話再遵從以往的做法去繼續做 。反而有兩件事情比較重要:第一:認識多啲不同朋友,令到自己可以更易換位思考,了解不同行業和不同處境的人面對的問題,讓自己能夠更周全地去判斷目前局勢。不要做只係識從自己角度去睇嘢嘅人。第二:嘗試以開放嘅心去面對一切事情,我自己都有很努力過,但係可能徒勞無功嘅情況,要用開放嘅心去面對。唔好覺得自己努力咗就會有成果係應得,唔好覺得點解之前得依家唔得,因為咁樣係會繼續冇結果嘅深淵沉落去 。
希望以上幫到手!下星期再寫。
#138 苦惱(26/01/2025)
#140 新授權卡通、和不同的家品/百貨公司洽談(09/02/2025)