#142 關於創業（4）（23/02/2025）

幻想你本身打算游去一個美麗嘅小島，過程中開始有啲落雨，於是你諗，唔緊要啦，咬緊牙關再游多陣就到，點知你發覺越游越攰，雙腳開始冇力，而落雨天色朦朧，你睇唔到個小島仲距離幾遠…… 你會選擇返轉頭，定繼續游落去？

如果要總結何謂創業，以上係曾經一個前輩曾經同我講過嘅講法，亦係我嘅體會 。有着最美好嘅願景，就好似想游水去一個美麗嘅小島，但游水游耐咗，漸漸好似睇唔到終點，過程時而孤獨無助，很多當中嘅委屈辛酸難以言喻，只有自己知道 。而且中間可能遇到壞天氣，令到終點更加看不清 。你開始有啲懷疑自己，見身邊嘅人好似比自己過得更好，但自己仍然向着一個睇唔清楚嘅目標不斷拼命游，你甚至懷疑到底終點個美麗嘅小島是否存在 。於是開始想返轉頭，但擰轉頭嘅時候，喺落雨天色朦朧之下，你亦都睇唔返自己本身落水嘅地方 。

你記得好多前輩都講過美麗嘅小島係存在，但同時你都記得絕大部份前人都游唔到過去呢個小島 。風雨交加，你越游越攰，甚至對腳開始抽抽地，你心入面好複雜。

創業就係咁樣嘅一回事，寫於工作失意的一個晚上 。