最近由於人手不足，以致有時候都比較繁忙，自己有啲過度疲勞 。太過疲勞有時候個人都會好攰，推得太盡短時間是可以，但如果太長時間都真係會有啲辛苦吃力（尤其回報暫時未出現時，更會懷疑自己其實咁辛苦為乜 —— 但我信正確嘅路係難行而少人行，而回報亦係慢慢來緊的）。當人係攰嘅時候難免會想逃離，兩個做法：一是放棄，第二就係找人去幫忙分擔工作 。
放棄我應該唔會諗，未去到頂唔順都會繼續頂落去 。找人去幫忙分擔工作呢一方面，就確實有時候會需要思考 。搵人分擔工作可以有兩個做法：第一個做法就係現有嘅同事每人做多少少，分擔下；第二個做法係請一個個人助手，幫手跟進自己嘅工作，分擔 。
關於第二個做法確實喺過去一段時間一直都有一啲本來自己嘅朋友，以及一啲我哋自己嘅客都想嚟幫手，緊密在我身旁工作，加入幫忙做 Re Pillow Co.，但都被我一一推卻了 。先講自己本身嘅朋友，有時候當你認識一個人都有10幾年時間，你會大概知道佢能夠承受嘅壓力以及工作量，我知道若然佢加入嘅話，佢係無法承受分擔嘅工作量 ，因而我覺得如果讓佢加入，最終恐怕我亦都冇辦法比到工作佢，而佢亦都覺得工作太辛苦不愉快，如此好容易係大家最後連朋友都做唔到，錯失一個10幾年嘅朋友，會更可惜 。或者有另一啲朋友你知道佢嘅能力水平，明知道佢未必能夠應付工作，就只好婉拒，無謂大家最後不開心收場 。至於一啲自己嘅客人，確實傾落都感覺到佢哋係真心喜歡這個品牌以及我哋做嘅事，亦都好有心想做，但實在若然要同我貼身工作，我暫時未遇到比較能力足夠的客人/應徵者，因此亦都只好婉拒 。確實這些是容易可以請得到，但容易/就手不代表是對於公司最好的 。最重要係做好件事。
分擔工作
於是我又繼續自己一個繼續做，但確實慶幸我自己身邊現時的同事亦都好幫到忙，亦都不用我擔心，自己解決不同問題（例如店舖的閘門壞了怎樣處理 —— 好多事情佢哋都自己處理好），令到我可以做返我本身要做嘅嘢 。其實，如果擰轉頭睇過去一直每月我處理嘅工作係越來越多,實在要多謝不同同事幫忙。亦都我發現原來自己頂唔順，太多嘢做要學識講出嚟，唔好自己一個人食哂所有工作，大家都係會可以幫手分擔到的，會明白原來我真係好忙，，因此主動幫忙解決問題，實在感恩。
未來隱憂
但現在慶幸係團隊細，同事都是好人亦及「有愛」，因此自己可以照顧到自己。但如果日後人多啲，就未必可齋靠自己「生性」，如何有效管理和營運，又會是一個問題。我暫時諗到兩個方法：1. 自己學；2. 請一個合適，有管理經驗嘅人來去管理和培訓。暫時我還未有定案。
#143 「有為」的風險、「停止呼吸」（01/03/2025）