#197 我在重整公司（15/03/2026）

早幾星期，農曆新年前左右我曾認真地覺得可能自己無法處理公司嘅業務落去，覺得或許因為我覺得我唔識點去做，會否要放手將公司交俾一啲專業嘅管理人員去管理會比較好啲，但係好似新年過後我諗通咗，呢過去嘅兩個星期，我覺得過得好似好慢咁，但係我做咗好多嘢，就係喺度我嘗試建立制度同公司嘅營運嘅框架，希望能夠盡量可以炒到自己魷魚，令到自己可以更加轉去做一啲更加重要嘅需要我做嘅工作，因為本身可能如果睇返再之前啲我自己嘅周記，大家都會知道我一直以來都係落手落腳真係實際去做，去搬貨去執行嘅人，我星期一至五都會每日準時返工處理工作，但是我嘅工作好多時真係落手落腳去做，令到自己唔能夠有一個退後去睇件事嘅大局觀。

我發現咁樣好有可能會令到我繼續再過多幾年依然都浮浮沉沉，非常每日忙忙碌碌營營役役好似做咗好多嘢，但又好似什麼都沒有做過咁。而我覺得或許有好多當中呢啲嘅營營役役每日嘅忙碌重重複複係源於我自己冇編排好冇管理好，因為我本身就係不是一個想做生意想做管理嘅人，我只係想做產品，其實我唔識得如何去管理公司，例如好似大半年前我曾經講過關於一啲自己遇到公司同同事之間可能有不和或者人事嘅問題，我慢慢睇清楚問題係最中心係其實我係沒有建立好一個好嘅環境比同事，我整個電腦/管理系統沒有做得好，同事做得因此會難，會有多機會出錯。而依啲係可以解決的，我現在就係做好依啲。又例如斷貨缺貨嘅問題生產追唔上進度嘅問題，其實呢啲情況都係可以透過更好嘅管理去解決到，或者至少會能夠令到個情況得以改善，即係你不斷咁樣催促負責車嘢嘅同事做快啲做快啲，佢總會做錯，倒不如應該要比充足嘅時間，喺管理上做得好啲，令到佢有充足嘅時間做好產品。依個，就係我現在做緊嘅嘢。

我發現好多時候其實我哋總會習慣將問題指向人哋，睇唔到自己嘅問題。但其實實情原來我哋自己往往好多時其實先係自己遇到嘅問題嘅根源。