#198 感謝客人和傳媒（22/03/2026）

最近一星期有客人十分有心，喺 threads 度分享用我哋床單覺得好好，依件事亦受到傳媒去 cover，令到多咗人認識到我哋嘅「新床單」依個 concept，其實我哋做係已經係做咗都好長一段時間，但或者咁講，確實我唔叻，真正實在認識「新床單」嘅人亦不是好多，原因係因為我做事嘅方法係偏向安全型、一步一步型 。我見到一啲前輩嘅由一間開到十間，去到全港知名，但係可能過唔到十年亦消失。我諗起一位我好欣賞嘅做鮮榨果汁/樽裝果汁前輩，曾經10年前，佢門市好多亦係喺各超市都有擺貨，但最後亦慢慢好似未能繼續落去，我係覺得係好可惜。當然，每一個人有自己嘅打算同人生嘅規劃，或者佢亦想休息下或人生進入另一階段，因此無去做落去，依個難以評論，各人有自己生活面對嘅困難。不過其實依類嘅情況係好常見亦應該咁講，能夠做到多過十年其實係好少數，係已好叻（借錢去頂住來做生意嘅唔計，我喺度意思係真係能靠做一門生意經營到維持到令每月同事出到糧 10 年）。個人覺得做 3-5 年都尚算係難度可以的，耐咗真係難，但耐到一定時期應該又好似會易咗（好似）因為會有人幫到你。

我係對自己做唔做到落去，常有覺得困難。好多嘢唔識，好多人唔老實，好多困難同問題第一次遇到，唔識解決。但慶幸係身邊遇到好多好人，好多「貴人」，喺身邊即使不是直接幫手，都係有時答我一兩句已幫助好大，當然有啲係其實係特別比咗機會我，我係知道的，例如今星期嘅 U Lifestyle 港生活 傳媒嘅報道，係對我嚟講係救我一命，受咗人恩惠我係記住，擺心上，希望他日有能力時，可以報答返佢哋。