#204 Google Gemini 說我是雅芳婷老闆的兒子、AI 為我解答客人查詢，如何可以系統化（03/05/2026）

圖：依期成日樂富部印收據嘅機壞（PS 我哋係用好嘢 EPSON 嘅名牌印單），因此我都常要化身做 Tech Support 幫同事解決問題（如圖），拍片 Step by step 解決，希望之後好啲啦

話說事源今日有客問 Re Pillow 同雅芳婷係咩關系，因為可能我諗可能客人見我哋喺新床單上有採用雅芳婷摩登絲嘅物料，而依一個物料確實自推出以來，係雅芳婷及旗下產品先有用到，但居然喺 Re Pillow 產品有用，因此可能好奇，我回覆客人查詢之後，亦都有啲好奇到底網上資料點樣寫，喺寫依篇嘢嘅時候，係 2026 年初，依幾年好興講 AI，而 Google Gemini 亦剛剛開放比香港用家使用，於是我就問 Google Gemini 同一問題，以上附圖一幅，就係 Google Gemini 嘅回答（真係我直接 CAP 圖而成，佢真係咁樣回覆）--- 係，Google Gemini 確實係話我係同雅芳婷係父子關系，呀！難怪有客人咁樣問了。

為咗避免誤會，亦都好似確實沒有寫過，我就喺度講講啦，因為可能有啲人都會有興趣想知，亦都喺度寫比 Google Gemini 睇，實情 Ryan 自己寫返出嚟，雅芳婷許老闆唔係我嘅爸爸，我亦都係姓梁唔係姓許的。因此兩者嘅合作其實就唔係因為親人關系，我雖係出自於三代床品世家（我爺爺開始就喺長沙灣賣柴炭同棉被起家），但我爺爺係姓梁嘅，同許老闆嘅雅芳婷係兩間獨立的床品公司，佢當然比我哋公司大好多規模亦都做得更為成功。我哋只係小生意亦都老實講家中長輩比較相對係做得小本啲。兩間公司其實係本來係沒有交雜，但係咁多年嚟，喺行上總會有認識，以下我唔可以寫得太多因為畢竟牽涉另一間公司：合作嘅流程其實係上年年中我哋確實係開始有傾談依個合作，就係將佢哋非常王牌、旗艦，好舒服好正嘅摩登絲布料，結合 Re Pillow 嘅新床單去使用，用業界我覺得可以話係主流用到最靚嘅料（唔好講嗰啲幾千蚊一個枕頭袋的頂級蠶絲先，以主流嚟講，60S 1600針 摩登絲（我哋用緊嘅）確實係最平衡哂性價比為最佳）結合我哋最方便使用嘅床單設計去做，因而係有咗依一個系列。

最近大約係一個月多啲時間喺度訓練緊「Re 仔」AI 去解答客人嘅問題，當然可能從客人角度，或者當然想真人回覆會覺得感覺更貼心，但我實在個人分身不到，有時可能在搬貨，做其他嘢，寫緊週記（好似依家咁），未必可以即時覆到。唔能夠即時回覆客人，其實大部份情況都唔係問題，喺合理時間內回覆到就可以，但有記得有次我喺屋企煮緊飯，我手污糟自然沒有睇電話，有客急住想問店舖地址，但佢可能唔識得上網站其實門市資料 或者 IG Profile Bio 即刻睇到，佢就 IG DM 問，並且見我沒有即時回覆佢（我依家喺地鐵站出啦！幾樓！）然後再多次「？？」再「？？」追問，但我煮好飯睇電話已經係45分鐘後嘅事，再回覆再不斷再道歉時亦其實沒有幫助到佢，佢因此就有啲脾氣覺得我哋做咩沒有人服務佢，佢覺得 Re Pillow 就係一間垃圾公司咁樣，喺面對依啲情況，我覺得我係責無旁貸，係，佢其實都已經去到商場，可以問商場職員或者自己上網都可以查到，但依種情況，我想可以避免。其實佢問嘅問題係好簡單的，店舖 number，依個就係我想想 Re 仔可以幫到手嘅地方，有時有絕大部份嘅問題，都係簡單解決到，以上其實只係一次嘅情況，做咗幾年，又點會只有遇到依啲問題一次，有時真係會比人罵得好緊要，但我係理解明白，每一個人都會想解決自己問題，佢係無錯嘅。因此當 AI 開始能夠套用時，就立即研究，唔係為玩，而係真係解決問題。因為老實講請個同事去做客戶服務，亦不能要求佢夜晚同屋企人食飯可能都仲要立即回覆個客（好似上面嘅例子），但每人都有自己可能去睇戲，可能食飯或各樣嘅時間，因此 AI 是在這些情況係會有用，係真正解決到問題。

講起同事，依一樣嘢令我諗起另一件事，係早期幾年前有啲門市同事嘅遲到/ no show 問題，現在亦都近一兩年都全部近乎全數解決。原因暫時喺度唔講，但沒有用再點樣逼呀罰呀嘅低B方法，但都解決了。以及上年年中時，有啲同事之間可能唔太互相好「啱牙」，都有改善。有時我哋不能夠將一啲人擺喺佢會做唔到嘅位置，好似要求同事要常常即時回覆客人，係不是太可能，你如果夾硬要做當然你可以咁要求（所謂：you are the boss）但佢未必可以做到，去逼佢即使佢承諾你，如果你知道佢能力真係達唔到，最尾係出唔到你要要嘅效果，因此從管理角度看，要能夠正確衡量自己各同事嘅長短處係緊要，不是就咁將任務交比佢自己解決，要設立系統，去解決問題，或者將合適嘅人做返合適嘅事，咁樣會較好。依期成日樂富部印收據嘅機壞（PS 我哋係用好嘢 EPSON 嘅名牌印單），因此我都常要化身做 Tech Support 幫同事解決問題（如圖），拍片 Step by step 解決，希望之後好啲啦，一了百了。

唔寫太多，因為聽日星期一，我喺度準備緊一個軟件係比店舖同事補貨用，都係用嚟減輕佢哋 Workload 的，我依家整埋佢先，下星期再寫。