#205 與另一行業內最頂尖嘅公司產品開發部香港總管見面傾計（10/05/2026）

今個星期有一個機會同另一個行業嘅業內最頂尖嘅公司產品開發部香港總管見面傾計，依間公司嘅同事我係上年已經見過亦都係頗有好感的，原因係佢哋都相當對我好好亦都睇得出佢哋都係想認真做好產品嘅人 --- 依一句嘢大家不要 Take it for granted，因為係唔一定的，即使好多公司，Shocking to me，可能喺市場上市佔率好高好出名，但唔代表佢哋會好認真做產品，或者亦都由於我本身出身係沒有經歷過打工嘅過程，所以我覺得做好產品，要超越自己同不斷進步係必須亦係本份，到返轉產品做到只係「正常」水平反而我係覺得咁唔得，但依個卻係似乎係常見做法。當然我亦明白一間大公司係有好多嘅各種事要處理，但不過係，我會覺得如果世界更加多公司以 Product 為本，少啲開會同搞人事搞程序，世界或者會更好。

講返上面，一如好多其他嚟到我公司嘅人，依個另一行業頂尖公司嘅人嚟到我公司，佢哋都確實係見到有啲衝擊，而見到我個位係坐摺檯摺凳，更加係有啲 Surprise，我 Offer 執好咗一個位執咗啲凳比大家圍圈坐，甚至佢哋其中一位同事可能覺得個環境太過「工業風」，話：「呃，要唔要睇下落樓下搵間 Starbucks 傾」，不過因為我哋公司嘅區係附近係無 Starbucks 或 Coffee shop 可以坐得好啲，因此係無嘅，但大家咁樣圍圍圈，擔凳仔坐，反而我覺得有種真係做實事嘅感覺，而及後幾個鐘傾落，都真係更加有成果。我記得 Lululemon 嘅 Founder Chip Wilson 喺佢本書都講過，做實事做產品，係真係落手落腳喺前線做前線研究，唔係坐喺一個靚靚嘅玻璃 Office 度諗。依個亦係我 Appreciate 嘅，咁先係 REAL WORK。

有啲朋友嘅 Start Up 係畫面好靚、Office 好靚、有時嗰啲反而唔係對事情最好，如果大家去諗諗自己遇到過嘅各間公司，尤其係 Start Up 或中小企，有時係要有啲唔舒服，對現況不滿，先會有火，好老實講我就係依個情況，我有時都覺得自己好失敗，因為我其實工作環境唔係靚，亦都搵唔到咩錢，對比好多人其實我依個年紀係算有啲失敗可能，但我信我做緊嘅嘢，我信依個 Process. 我都當然怕自己會錯判，但我嘗試用我睇過嘅書，睇過嘅其他前輩嘅 Interview，我 Trust the process，好似練大隻一樣，若然你 Keep 住做而你不理會可能開頭一直得個做而無成果，只要你做嘅嘢係啱，你係終有一日會長到肌肉，只係個過程嘅痛苦同漫長，好似睇唔到成果係會令你懷疑，but its just a matter of time. 一定會有 Result，我願我做緊嘅嘢都係。（喺度我都必須講亦有可能，或者有一日我真係失敗，以上全是我一箱情願亦都係蠢豬豬嘅諗法，超級大傻仔。Totally Possible）我個人信其實依個世界無咩秘密 key/ shorcut/ secret to success，雖然個個都覺得一定有嘅，我覺得做事要用心去做，要有善良嘅心去開始做一件事，然後要努力係目標唔係為自己而係為他人（依個要係真心先得，不能扮嘢話「我想幫人」但其實由始至終都只顧自己，依個有啲人係連自已都呃埋，但應該心知），再之後不需要好叻，唔係太蠢就應該可以執行到事情，如非話想大富大貴，應該夠嘅。

睇我寫咁多，明眼人睇到或者都知道我喺度說服緊自己 --- 或多或少啦。話唔係就都呃你。有邊個係想人哋嚟見到你，都覺得不如落去搵間 Starbucks 傾吖...... 不過我想講返講依句說話嘅人我知道佢係無惡意，亦都佢係比機會我嗰個，我係好多謝佢比依個機會我的。另外早前有另一啲公司嚟搵我佢哋見到都叫我一定要好好 record 低喺度嘅工作日子，因為到時可以同人講我哋就係咁開始，非常咩都無，畫面唔靚，好 Humble。但願會有依一日啦。