#051 發現自己喺商業世界嘅渺小（21/05/2023）

按：

今個星期心情有啲灰，寫得有啲雜亂無章，而且比較負面，我知道未必有人想睇。不過我都會寫出嚟，因為我為求寫實，想真實記錄每一週嘅事同心情，畢竟呢個先係週記嘅意思，日後睇返先有意義。

———

感謝大家嚟到新一週週記，每週我都同大家喺網上一會。嚟到第51篇，亦即即將寫咗一星期，啱啱我返咗去睇第一篇週記（大家都可以 click 返去睇：https://repillow.co/blogs/weekly/001-5-6-2022），當時應該係少煩惱好多，感覺好青澀。一年過去，了解到商場多殘酷，而自己一個人喺商業世界幾渺小，要跳出自己嘅格局係幾咁困難。

一年前後的分別

那陣時唔知道商業社會點運作，以為只要有一股勁衝，只要有心，一定可以擺啲時間就挑戰到市場現有競爭者。但事實並唔係咁易。當中有啲事情係真的：我發現大公司制度阻力大（eg 希望盡量唔好做有機會有損公司名譽嘅事，盡量唔好做啲好創新、奇怪嘅產品，要推行新事物好難，多數人比較懶惰等），但同時現實係：大公司擁有我沒有嘅規模，做一件產品，唔會遇到咁多限制。

依一年來，最見到嘅係，自己嘅限制，同要喺市場上企穩嘅困難。

我嘗試同自己講：It’s ok, I can do it. 但實情係 it’s not ok. Not ok 嘅原因係：我好明白消費者係好簡單，佢唔會理你有幾辛苦去做，佢只係 care 最後嘅結果 — 佢用幾多錢，買一件點樣嘅 product。然後有時候佢哋未必會明你花心機去做好嘅某一啲位係為咩。相反，我見過細公司做唔到大公司大量生產嘅低廉售價，有啲人會覺得產品唔抵，甚至覺得細公司產品貴過其他大公司係「賺到盡」、「呃錢」… etc，我曾經好想代呢啲細公司抱不平、反駁，後尾都係算了。有時有好多委屈喺心入面只能夠吞落去。每一個人都只係喺佢角度睇，唔緊要啦。

所以喺例如 Re Quilt 2，如果唔夠錢唔夠資源，唔怨人！默默花更多時間喺每個細節度解決，用比大公司花更多時間同努力。佢用10個人去做，我一個人做，最多自己辛苦，寫呢啲週記發洩情緒，但我唔會請多人手令成本高咗要轉嫁消費者，拉返勻條數我可以同佢哋比較。我可以做到同價位甚至好過佢哋嘅產品。當然心靈同身體要承受更多，但我可以成就件事，總會值得的。

Amazon 和 Ford 的決心

Amazon 嘅 Jeff Bezos 曾經講過：「Amazon is willing to be misunderstood for long period of time. 」（譯：Amazon 唔介意要被人誤解，那怕係長時間。）同樣，當年將汽車普及化，福特汽車嘅 Henry Ford 亦一樣有呢一個決心。當所有行內車廠都認為汽車只會係一個有錢人用來取代騎馬嘅玩意，係 Henry Ford 相信佢可以令到汽車可以被平民大眾擁有，唔係有錢人先揸到嘅玩意。佢努力研究點樣可以降低生產汽車時間同成本，令更多人買得起，但佢嘅努力被全行否定，無人看佢在眼內，我願意付出一樣嘅心，投放比 Re Pillow Co.。要默默地喺背後努力做，time tells，慢慢會有人欣賞。但時間要夠先得，唔可以放棄。

結語和生活中的「小確幸」

最近工作上煩惱較多，感覺處處唔太順暢，近幾個月不斷每日解決問題解決問題（當然，從好方面諗，呢個代表我正喺度開緊一條路，去準備緊自己迎接即將嚟到更好嘅未來），每日遇到錯折，有時難免氣餒。最近公司門市一位 part time 同事也許見我好灰，推薦咗一本書比我睇：

本書用一個故事去包裝同埋貫穿一連串道理，雖然個故事係比較「幼稚」一啲，好似搞笑咁，但佢內容係好好的，道理亦都係真實有跟據嘅，睇完呢本書自己心情都好咗，實在好感激該同事，有時喺最唔開心嘅時候就係需要呢啲。I am just so grateful to have people like these around me.