#186 2025 回顧（28/12/2025）

去到 2025 年最後幾日，可以係時候嚟個回顧。今年好長做咗好多事，由1月開始講： 

2025年1月：新床單當時係仍然係一個比較多問題嘅階段，包括一啲係產品上當時係仲會有啲車縫方法唔理想，會可能邊位啲車線係唔靚，底框條索繩放入洗衣機高轉會「FING爛」，索繩亦都用緊金屬頭會可能會 hi 花客人屋企幅牆，底框個底扣索唔緊，側面個袋仔位置喺床中間啲人晚黑落床可能會「差錯腳」Kick親。（以上依啲所有問題依家已經完全改哂物料做法，完全無哂）。喺管理上，啲貨成日斷貨。當時我哋只有一款卡通係 Dustykid ，一款地圖床單同埋各淨色，得嗰幾款，單又唔係多，都管理唔嚟，都係斷。每日就係極度處於解決緊急問題，救火嘅狀態。晚晚做到好夜 

2025年2月：開始做緊新嘅卡通，日本 SAN-X 嘅 Coronya 麵包貓。無咩人識佢不過因為佢實在太可愛因此都好受客人歡迎，原本打算2月可以出於是2月10號就post咗條片自拍自己工作做緊啲咩，影到電腦上面整緊麵包貓，以為 preview 下好過癮，點知因為缺乏做依啲授權卡通嘅經驗，有好多授權手續前前後後，最後搞到5月先出到，嗰3個月過得好辛苦 

2025年3月：拍咗段自編自導自演嘅換床單廣告，同埋今年第一次去上海工幹，自己一個夜晚無事做，無意行街發現咗一間小籠包叫做「萊萊小籠」，喺南京路後面一條後街度。好好食。我重申，好好食。跟住之後去上海做嘢，每次都必需要去食。推薦大家。3月亦都係第一次喺千色店擺 Roadshow，喺元朗千色，雖然嗰次之後，就沒有再有下次，但都係一個好好嘅一次嘗試，睇下之後再有沒有機會。 

2025年4月：第一次喺沙田一田擺 Roadshow，4月擺到5月，係好好嘗試不過亦都係沒有然後，沙田一田如果你哋睇到依度歡迎聯絡我。去咗參觀元朗嘅 SAA 保護遺棄動物協會，參觀完了解到佢哋嘅困難，想為佢哋做啲嘢，於是有之後嘅舊床單回收計劃（後來因為協會都收夠物資，亦都同事發現有啲疑似不懷好意嘅人將啲曱甴甚至可能對動物有毒嘅物質包喺床單入面送出想借我們手毒害動物，因此被逼停止）。新床單 同時亦都獲得了 香港設計獎 Hong Kong Smart Design Awards. 收到迪士尼聯絡我留意到我哋，尋求合作。 

2025年5月：終於出到日本 SAN-X 嘅 Coronya 麵包貓，同時亦都出咗新版本 Base，解決咗 1月時講嘅各種問題。喺過去幾個月亦都開始 implement 一啲系統，令每日順暢啲，斷貨少啲。開始咗上面講嘅為 SAA 保護遺棄動物協會而做嘅舊床單回收計劃。同時亦都喺5月底會展家居展擺 Booth。 

2025年6月：差少少喺何里活廣場開舖，但最尾大家傾唔成。因為當時已經發現收集舊床單出現嘅問題，因此截停咗。我開始幫 SAA 諗不如出一啲產品可以幫佢哋籌款，而且唔係好似出面慈善義賣咁短期，係長期嘅，於是大家喺度夾緊，同時間亦都畫緊小王子 Le Petit Prince 嘅合作花款。 

2025年7月：喺屯門市廣場開咗間 Popup，因為無錢，同同事幾個人自己整啲裝修佈置等，開頭以為OK但最後做到嗰晚好辛苦，尤其自己拆 + 搬走商場裝修圍板，原來啲圍板咁重，做到想死。但舖頭都順利如期開張。SAA 聯乘系列推出，產品不扣除成本 20% 會直接捐款給 SAA 保護遺棄動物協會。同時開始咗購物積分回贈計劃，其實依個係已經有幾年想做，今年終於做好，終於有返個係實際可以回饋客人，又唔會係搞到好複雜好煩嘅會員計劃，因為我自己都好唔鍾意。 

2025年8月：小王子 Le Petit Prince 聯乘系列大致定好款式，開始做 Sample，覺得好靚，靚到可以掉哂之前嗰啲。開始睇緊樂富廣場，覺得可以考慮。 同期開始試用 Barcode 系統幫忙管理貨同埋在門市銷售用，減少出錯。

2025年9月：開始試緊做迪士尼系列，但比較多阻濟。喺牛頭角食咗一間茶餐廳叫「金飯館」，個椒鹽豬扒炒飯驚為天人，好好食，如果喺附近返工一定要試。 

2025年10月：因為後勤嘅事我開始做唔來，於是其中一位本身係喺前線嘅同事 Oscar 返咗嚟後勤到幫手，開始時係一個星期一日，後來兩日、三日咁樣慢慢適應，最後嚟到依家已經日日返，好幫到手，雖然開頭會有啲適應上可能都有出錯未熟手，但因為本身佢亦喺我哋舖頭出身，因此對於產品同埋店舖需要都好熟，令到以往可能我哋後勤唔係同前面店舖個聯繫咁緊密嘅，有咗 Oscar，令到整間公司不同部份喺運作上係更加緊密，合作更好。 

2025年11月：Le Petit Prince 小王子系列推出。第一次試去出一啲外國嘅合作，反應都確實超預期，去到依家小王子藍色嘅被袋仲斷緊貨，多謝客人支持。 

2025年12月：Winnie the Pooh 系列推出。第一次出迪士尼系列，覺得有啲神奇。因為幾年前我從來都覺得「這些機會不是我的」，迪士尼咁大嘅公司點會留意到我這個細路...... 但今日居然有機會，覺得都係一個小小嘅榮幸。另外同時開了樂富廣場店舖，令到我們店舖已去到5間。其實好多人誤會覺得可能開舖係賺錢，但其實唔係的，我個人係依然好普通人一個，只係我想做好件事..... 但此事係真係好難。希望可以啦。