#214 能力範圍內comfortable 原則及常用理論（12/07/2026）

有兩個最近喺工作上學到嘅道理，發覺都喺生活中比較有用，喺度寫一寫。

常用理論係講出嚟好顯然易見但好多時我哋為人會忽視的。個理論嘅名係我改的，因此 Google 係唔會搵到依個理論。常用理論嘅原理係我哋應該跟據正確判斷事物是否常用而去衡量佢相應應該值得花費嘅價值。我舉個例子：可能你平時返工唔會揸車，但你覺得揸車幾個癮，買架車 Weekend 揸下周圍去下都好，如此情況，當然你揀車一手二手，最平幾萬蚊其實都幾多選擇，亦都Afford得到，但你再去睇下啲十萬零蚊嘅，唔試尤自可，一試覺得真係有分別，於是乎你開始諗會唔會揀架十零萬嘅嚟揸。依個價錢，你絕對亦係負擔得起。根據常用理論，喺依個情況由於你架車只係Weekend拎嚟揸下，其實絕對係不應該去買架貴嘢的。而且，隨時，你以前亦無揸開車，你最近覺得過癮所以想揸，而你亦無任何好實際嘅需要，隨時你會揸一排之後覺得無癮而唔再揸，如果洗貴咗，而汽車亦係基本上係會貶值嘅消耗品，而可能到時要甩手亦都唔Keep到咩價值情況下，其實你應該考慮買架平平地玩下先，而甚至可以考慮 Weekend 租車。同樣，我最近聽到一位非常有錢嘅前輩講過，其實好多人可能有個浪漫嘅諗法，想可能喺第度（香港以外）買層樓，平平地退咗休後當Holiday Home咁間中去下，佢亦都做過依件事但最後都係賣哂，佢講得好客氣但個概念就係，其實要Manage兩間屋而又有physical distance係一件好煩嘅事。打風落雨你會擔心嗰度會唔會入水，要唔要去睇佢，而又其實仲有好多一啲實務上嘅嘢要管理，管理費要交 etc，又其實世界咁大你未必其實退休後係想淨係住嗰度，不如 Airbnb 好過。反而你香港間屋先係你stay最耐嘅，你朋友仔女喺度，圈子喺度。依間屋其實仲緊要仲值得住得好。唔好話咁遠，只講香港，其實如果有兩間屋嘅朋友都知，如果你另一間屋係吉嘅 自己唔係住緊，即使都係香港，如果唔同區manage都係麻煩。

有租客用緊可能反而仲好，因為間屋有人睇住。當然人生好多嘢睇唔到咁前，但不過如果改到其實仲有時間改，或者可能你未做依個決定咁就可以改變。其實不單止樓同車，好多嘢其實常用嘅不妨買好啲（其實好似好sell咁不過床品真的係的，用過靚啲嘅你會發現之前嗰啲不是話唔得，但自己晚晚用嘅不妨用靚啲，瞓得好係好緊要），生活中有其他嘢都係，不妨可以諗下。

能力內 comfortable 理論係盡量做事唔好做一啲太過扯到自己好緊去到盡嘅做法，要係喺能力範圍內 comfortable 的。依家依個時候可以講但其實我們去簽 Disney Licensing 去推出 Disney 嘅系列嘅床品確實係比較係喺我哋能力範圍上去到比較盡的。Disney Licensing 嘅床單當然我哋亦都不能賣得太貴，不能令到消費者承擔，因此其實中間係有好多本身可能其他產品可以賺返嚟嘅利潤都去哂貼依個 Disney 嘅產品，最後是令到公司係有啲困難的。當然你話可能 Disney 比到我哋顧客對 Re Pillow 嘅 reputation 同埋信任度，咁無得計算亦都係正確，但其實如果話再返返轉頭會唔會做呢，可能會有另外諗法。當然可以話人生無如果，但我哋從依啲事上學到，之後就喺其他事上面都係咁樣留意。