圖：我自己去送貨，天時熱到三十幾度時影的。
好耐之前曾經有前輩同我講過，its not about how, but who. 佢意思係好多時我哋生活中遇到嘅問題，解決唔到，或者覺得有困難，個解決方案永遠都唔係應該問「點樣去解決」（how），而係應該問我應該搵邊個人（who）佢可以幫我解決呢個問題。有段長時間我都唔係太相信呢一句說話，源於係因為我覺得點會遇到一啲識解決呢個問題嘅人，因為嗰啲人佢唔會理會我。而確實喺工作嘅事實上，的確過去幾年我都係比較孤身獨鬥，自己要需要解決問題。可能有啲人唔明白，因為知道我本身係出自於一個床品世家，公司背景是「惠記」，係由我爺爺開始，喺香港做床上用品，會覺得應該總會親戚或者家族，可以幫到我手。但是其實係我嘅情況佢哋唔太幫到我解決我的問題，反而有時係我要思考如何解決佢哋面對的問題，原因喺度不能夠詳細解釋，但亦都因為咁情況所以其實我都要自己去摸索同埋學識解決各種問題。呢個過程係非常痛苦，但睇返轉頭係一個好事情，因為咁樣係迫使我必須要進步同埋學識更多範疇嘅事，從而其實亦都係裝備自己嘅一種，同埋可以避免自己會受騙。有啲人曾經講年輕嘅時候去吃一啲苦，或者趁後生，要經歷多啲鍛鍊磨練係一件好事。我以前唔相信，覺得梗係最好唔好，但係係真的。之所以需要年輕去經歷係因為年紀大咗之後先經歷的話就會太遲，學嘢同埋辛苦梗係早期好。
又想講一個我爸爸細個教我嘅道理（第 #210 篇時，好似都有另一個爸爸教我嘅道理），我細個住沙田，屋企樓下有一間大家樂，記得細個曾經有次爸爸帶我落去樓下大家樂食早餐，具體我唔太記得，但我記得類似食到最後，我自己個盤上面有兩件食物一件應該係腸仔（好吃的，我想吃的），另一件係好似係蕃茄（我唔鍾意食的），跟住我望住兩件食物，揀咗去食蕃茄先。爸爸問我，點解我想食蕃茄先，我同佢講，因為我想留返最好食嘅最尾食，跟住佢就同我講「先苦後甜」同埋「先甜後苦」呢兩個道理。
我當時都係唔太明白，以為呢種道理只係適用於食早餐食咗蕃茄先定係腸仔先呢啲決定上面，後來我覺得我而家出嚟做嘢幾年，我明白原來講嘅嘢係講緊工作，講緊人生。
但有時我覺得不得不承認，上帝幫你關咗一道門，會幫你開返另一道。當你吃苦吃到一個地步時，或許個世界真係會有人睇到，而比你一啲機會係幫助到你的。
今個星期我有其中一日和雅芳婷同事去他們的國內 Office 工作，傾一傾一啲產品嘅事，有一啲我喺生產上遇到嘅問題，一直過去一年我都想解決，但解決唔到，而我身邊嘅識嘅人，即使係行內嘅人，亦都同我講解決唔到。於是我又再上網搵資料，又再問啲識人搭人識嘅人，如此種種，但都解決唔到。
點知依個問題，我依個星期冒昧請教雅芳婷，佢就即刻好爽快話：「哦！依個問題，有呀！我哋都有遇過，依家已經解決哂了！拿拿咁咁咁...... 」並且將依個煩繞我成年嘅問題，用咗10分鐘解決到。當然，佢哋今日嘅10分鐘，係源於過去幾十年嘅努力先做到。
但如果返返轉頭，若然我沒有過去幾年嘅不斷去試同努力，亦可能其實唔會有今日有機會可以遇到雅芳婷以及得到佢哋幫助，我如此普通嘅人...... 不過都好感謝佢哋，我都必然會將此事擺心到，我會之後一定會搵機會睇睇如何報答佢哋。雖然，佢哋如此成功，其實都唔缺啲咩，不過我一定會報答佢哋的。
#211 產品細節的追求：連一條線都重要（21/06/2026）