#224 積分計劃一年、待時而動（20/09/2026）

Re Pillow 積分計劃係喺 2025 年 7 月 1 日開始的，之所以有依一個積分計劃，其實唔知我喺早期啲週記有無寫過？但係係因為我想整一個回饋舊客嘅支持嘅方法。因為我成日見到啲公司好鍾意有新會員優惠，或者新客戶優惠，點解從來都唔係回饋返自己本身嘅客？呢個少少似好多時我哋做人，明明我哋鍾意自己身邊的人，但係我哋對外人卻好似對比起自己身邊嘅人更加好。我想改變依件事，我想整一個 Scheme 係益舊客，唔益新客的，所以有依個單單 8% 回贈計劃，總啲每單會有 8% 回返比客下一單（一年內）用，簡單易明，唔使搞咁多複雜嘢，沒有咩隱藏折扣沒有咩搞嚟搞去，但係亦都喺堅堅實實真係直接折扣。依個就係積分計劃。但我知以前因為受技術限制，當時唔係咁成熟，因此要將啲積分換成現金卷過程喺過去時係我個人覺得係未完美的，因為係喺網站右下角做完再 Copy & Paste，今個星期我將佢再更加做得再好啲，除咗以往可以喺右下角小工具嗰度做，依家仲可以係會直接喺個 Shopping Cart 度可以直接用一個 Slider 嘅形式去換分用現金劵，直接套用落張單度，即時減價，更直觀更易用。當然，因為都係我做嘅，所以當然同幾個星期前#222 週記圖中嘅 Shopping Cart Update 會 Integrate 埋一齊，左邊用積分，右邊做送貨日期，唔咁阻定。

其實我係覺得好多依啲細節，喺依個世界係慢慢無咗。花時間去做好依啲細節，不及可能你搵某某明星網紅幫你拍個廣告，或者自己喺網上講啲好爆嘅嘢嚟得實際，但到底依個是否一個經得起時間考驗嘅做法，我個人覺得還是都係要搭低頭，堅堅實實去腳踏實地做好成個公司各樣先係最有用嘅方法。沉穩，努力，不求他人知道，但去到當時機嚟臨，一切就會 Worth it。

依個其實就係我一直做緊嘅事。