#156 新版 Base、家居博覽、看舖、朋友拓展外國（01/06/2025）

歡迎大家又嚟到今個星期嘅周記，轉眼間呢個咁樣嘅習慣陪伴我已經有三年了，每個星期週末靜低落嚟寫少少嘢 。轉眼幾年，個市變咗好多，香港亦都變咗好多，但我仍是我，我仍然是一個普通人，想去做返好我自己做嘅嘢 。 

今個星期比較忙碌，有時忙碌到一個地步，我真係好想好想唔做，可能我有啲部份同事都知道，今個星期工作多以及各種折磨，嗰種辛苦，我覺得係真係如果唔係開始咗個頭，如果可以重新揀一次我或者未必會做 。有一位香港我都好敬重嘅創業家曾經講過，創業最開心或者叫做成果和努力係比較「高性價比」時係喺規模比較設一個一人公司，嗰時係最好，及後如果想擴展嘅話就會經歷一段痛苦時期，此言非虛 。我這個小生意仍係小生意，但隨住有幾間門市和繼續做產品，慢慢係越嚟越辛苦 。 

今個星期剛剛推出咗我哋內部名為「四色戰隊」嘅新款式 Base 底框，除咗加咗新色之外，亦都喺各方面細節都有 update — 詳情唔喺度講啦因為如果睇返 https://repillow.co/bedding 一頁現時都有寫，無謂重重複複，但除咗各種細節 update 之外，亦都新增咗一個好多人想要嘅功能 — 可以加入防水依個功能 。防水層會係扣喺床面同床褥之間，底框上會有得扣住佢，所以不論你係有貓狗或者小朋友，又多一個原因轉用新床單 。我係會繼續不斷去改良佢，直至新床單成為更多人的一個理所當然的選擇。 

除此之外，今個星期我哋亦參加了會展的家居博覽，我亦都有落場，但由於自己確實真係唔係講嘢好，我同事講得啱，我係怕怕醜醜，喺「Sell 客」上唔係好掂，本身亦有一堆工作未做，人手又唔夠，因此我就都係落返舖好啲，於是乎我同北角同事對調，有啲日子都係我落返舖到看舖，北角同事去家居博覽。喺北角舖畢竟係相對靜啲，有枱有凳，可以做返我嘅工作。 

其實看舖也有看舖嘅好，因為會接觸到啲人去聽到啲客人嘅諗法。當自己沉於日常自己工作嘅位置時，睇嘢會有盲點 --- 可能會過份 Focus 喺某啲錯嘅部份到，而無去 Focus 喺另一部分。例如，假設你係做 TShirt，你不斷埋頭鑽研如何可以做到件衫更透氣 -- 依個無話唔啱㗎，不過原來個客只係想要多隻色揀。 

看舖亦都有個好處係我覺得個人會學識點樣睇人。依樣嘢都係看舖經驗多，慢慢就會建立到。現時其實好多我依個年紀或暫再後生啲嘅年輕人，確實自細相對只係對人機會少咗，我都承認自己唔係喺對人上好識點睇人。係工作之後，慢慢接觸人多啲，會開始識睇人，個人技能係必須，但如果識埋睇人就更好。 

最近不下於幾位嘅朋友都講到自己公司嘅生意由於不是太好，因而決定試吓拓展海外市場，我諗依個都係近兩年一個好常見嘅情況。但實在坦白講，到底係咪去咗外國市場會好啲，真係都唔一定。都講真都真係幾困難。而誠如某香港知名商界人士所言，依家香港政府態度係想市場上各公司喺收縮嘅市場內「自由搏擊」，有啲人以前會幻想飲食同零售市道咁差，政府會唔會去支持或者如何去扶助一把，幫一幫業界去渡過。現時係淘汰戰時期，總之唔會有人幫你，要自己找出路。