#157 小王子電影、上海出差、寵物展首推與 SAA 聯乘系列（08/06/2025）

由於工作原因，今個星期第一次睇咗 小王子 Le Petit Prince （2015） 套戲。依套戲如果睇 movie poster 會覺得佢係 for 小朋友，但睇落就發現完全唔係，係探討「大人」「成長」「愛」「死亡」依啲永恒議題，如果當年啲家長帶咗小朋友入戲院睇真係唔知點。成長係每個人必經，而社會教我哋現實殘酷，於是我哋將自己嘅情感同心事藏喺心底，每日以「最好嗰面」見人。於是乎我哋成為成熟、負責任、堅強嘅大人，告訴自己「我活得很好」，但中間當初昔日嘅你，你昔日嘅純粹係唔係可能已經無咗。小王子其實套戲牽涉好多題材，但依個係戲入面最突出嘅題材。戲入面有句金句係好好：

All grown-ups were children first. But few of them remember it.

套戲係好好。有時間值得睇下。

上海出差

由於喺 Hong Kong Smart Design Awards 得獎，獲得了資助可以去上海參加 Design Shanghai 設計展，亦都去不同設計公司作交流，當中亦有機會見到一啲商界「猛人」，由於依個我唔知能否公開因此在此我就唔講到底係邊個同埋談話內容，但我想講一個留意到嘅現象就係有啲人，可能有時對於一啲比較成功嘅人士會有一種唔太尊重或者覺得冇乜大不了嘅心態（例如話：佢都係靠好運啫，佢都係靠屋企啫！佢依家都唔掂啦…. 之類的說話），我覺得呢個係都頗為常見，但係唔係一個好嘅現象 。因為其實好多時候呢啲比較成功嘅人士，其實當中有好多嘢值得我哋學，尤其如果真係虛心啲去聽人哋講，去問吓佢問題，我發現其實有好多嘢學到 。好多時佢哋都好願意教，好願意分享經驗 。例如今次旅程之中，我亦都從一位非常成功嘅商界人士（如果講出佢公司嘅名字，相信所有香港人都認識），學習到一啲嘢，同埋親身近距離同佢傾談過，亦都問咗一啲我心入邊有嘅問題，佢俾我嘅答案係好好，水平係超越普通其他人 。如果可以（當然我都知道冇可能），我真係想可以請佢食飯，俾晒我現時有嘅資料俾佢睇，可以同我分析我現時 Re Pillow Co. 如何做會比較好，因為確實我係希望可以得到啲前輩意見。

另外題外話，我覺得上海其實係好多方面都好似香港，我覺得有機會係未來香港，如果想率先知道未來嘅香港係點，上海係一個可以參考嘅城市 。

寵物展首推與 SAA 聯乘系列

喺剛剛過去嘅週末，會展有寵物用品展舉行，我哋聯同保護遺棄動物協會 SAA 首次聯乘推出被子 pre-launch，之後會正式再公開。