#189 公司往往會放大創辦人/主理人嘅本身嘅性格和處事（18/01/2026）

最近有一位本地初創公司老闆（創業十年嘅年輕老闆）喺網上 threads 平台引起好多批評，佢係一個算係喺香港 Startup 界上公認極成功嘅人，係做生產/零售業，做一啲穿上身嘅產品嘅 。創業10年，已零售店有20間，全部都係一流嘅商場地點，而佢年紀只係三十歲出頭。我亦有緣認識到佢，畢竟佢係喺創業界入面係一個其實幾獨一無二好成功嘅例子，因此我亦有請教過佢一啲我喺工作上面對嘅問題 。 

其實如果我無記錯，應該係 Airbnb 嘅 Brian Chesky 講過，一間公司發展成如何，好大程度係來自於佢嘅老闆本身個人性格如何，而公司就係會放大咗佢老闆嘅本身嘅性格同處事方法 。每一個人嘅性格係唔同，而做事嘅方法同心地亦係唔同 。喺度我並不想話要喺依位老闆遇到嘅問題上加多一刀，亦都唔係為佢講好說話，但喺過去其實我遇到過好多比我叻嘅前輩，確實真係有唔同性格而有時係真係我都唔同意一啲做法 ---- 有啲時候聽別人講嘢，你已對佢內心諗嘅嘢有啲了解，例如佢要覺得要點樣賺錢係理所當然，而依啲嘅人係非常非常之多，奈何有時個社會係獎勵依啲嘅人。反而嗰啲老老實實嘅前輩，有時日子過得困苦。唔受人歡迎。 

細個我睇戲，總會有壞人同好人，喺當時我已經諗，到底嗰啲壞人佢知唔知道自己係做緊壞事？我諗佢總無可能會覺得自己係壞人，做緊壞事並且都自己OK掛？佢一定有某種方法去說服到自己，覺得自己做嘅事係好事，係有利個社會嘅，先會做得落手。大個我發現，係，原來係源自於有時本身個人對於咩為之對錯，咩係合理，原來不同人嘅定義係可以好唔同，並且佢係由衷 真心地相信的，因此先會有惡人 同 好人。 

但雖則如此，我信世上係有公道，惡人唔會永遠得呈，而好人亦不會一世揸兜。盡力而為，做好自己，律己以嚴，而憑為社會嘅心去做。