#190 BLACKOUT 2026 是一個內部的壓力測試，也是對我的測試

每年去到依個時候，我哋都會進行一年一度嘅 BLACKOUT SALE。今年嘅難度係比往年更高，原因係我哋嘅款式係往年嘅幾倍，一句概括就係難管理，好易出錯，可以話係一個內部嘅壓力測試。比起往年，我哋今年係舖頭多咗一個 Barcode system 嘟貨去減少出錯，而後勤亦多咗一位專出貨嘅同事。不過雖然如此，今年係出貨錯比起上年係多，令到我都好頭痕和苦惱。我明白人唔係機械人，無可能完全唔錯，但點樣可以錯少啲，this is the question. 

米已成炊。喺現時係需要先喺後勤 customer service（即係我）先盡量幫客人解決問題，盡快補回正確產品比客，盡量唔好為人哋添煩亂，因為已經搞錯咗比人，快啲幫人做返好先。過埋依幾日，我同事會再跟下到底每一單出錯嘅原因，睇睇內部點解會錯，點樣日後避免。 

我亦都覺得，由接到寄錯貨嘅投訴後，由於見到錯都多（由其第一日），有一刻有啲好似自己語氣唔好對同事，話佢「有無搞錯呀。咁錯。錯咁多」（雖然我講完我自己都立即同返同事道歉），但我覺得我自己可以做得好啲，依啲就係年輕人往往抵唔住頸嘅表現。我係真係好想好想做好對寄嘅服務，但其實畢竟同事肯定唔會係「特登出錯」「特登想去搞我的」，因此其實我去怪責佢又為何呢，係不會有助盡快解決問題，可能仲令佢壓力更大，仲難做好。我其實除了係自己發咗脾氣之外，係無做啲咩幫助到件事。道歉係亦都唔係太幫到件事，只係好過唔道歉咁解...... 

喺前線，BLACKOUT SALE 亦都係考驗同事能否招呼到啲客，招呼得好，尤其如果工作量大咗時，店舖之間嘅溝通又可否 effective，同客之間嘅處理又會唔會有錯漏或問題，依個就係測試。 

除此之外，喺過去半年，其實我都喺度陸陸續續套用緊不同嘅軟件工具，去以致令到後勤工作更加自動化，我諗未來世界將會越來越係會更自動化，好似以前唔會有咁多嘅產品去令生活更好，物質係少啲，嚟緊十年，我覺得會係software軟件會大進步時候，令到好多嘢可以少咗人嘅involvement，會令人生活更加順暢。而如果唔去擁抱同迎接依個世代，怕且後果只有一個。