#191 一個打工轉創業再轉打工的故事（01/02/2025）

曾經睇書時睇過一句咁嘅說話，大家睇下覺得有無道理：「If you give yourself a month to do something, it will take a month. If you give it a day, it will take a day.」我個人覺得係好啱嘅。尤其如果你離開咗職場，自己出來獨立創業，做「自顧人士」，咁就真係需要自己照顧自己，自己管理時間。無人會逼你做嘢，無人會比 deadline 你去做。知否一件事情唔做嘅後果會係點？係無後果的，無人會責備你，無上司會話你。後果係嗰一年你會做少咗嘢，你自己知。因此自律喺依個環境係好重要。我有朋友哋因為本身唔太滿意自己嘅工作環境，同上司唔啱，亦都覺得份工有啲部份不是太合適自己，同自己想做嘅事係唔一致，亦都覺得好似份工人工唔太好，將來前途晉升嘅機會都唔多，但最後就離開咗份工，出嚟自己創業。喺度為保護佢我唔寫太明顯，但出咗嚟自己創業之後，其實開頭都係滿腔熱血，頭一個月好多 Update，但漸漸做落佢亦發現原來不是咁簡單，開始覺得有困難，亦都咁講，唔係如預期咁好，多咗好多自由度，多咗好多 Free Time，但搵唔返之前佢「本身都唔滿意嘅人工」，即係比之前更加差咗，而且仲覺得好似前途更加難行。 

開初時，佢本身覺得應該自己出來做，可以搵到多啲錢比屋企人，可以比到自己女朋友好啲嘅生活，唔洗人地擔心，但依家好似，佢係好 Free，佢樣樣都可以做下，人人喺度趕返工時，佢仲未起身，但好似更迷失方向，同埋收入不確定。而佢依家其實正諗緊不如搵返工，返返當然就唔會係舊公司，但可能搵返自己本身嗰行嘅差唔多職位做返。 

我甚少講依個 topic 但實情依我自己嘅經驗，其實自己出來做嘅現實係，係好大機會，如果好似我咁樣普通人又唔叻，係會係需要更比返工努力，但換來係會比本身返工嘅人工更加差，依個係正常的，我都係咁樣。其實香港本身各行各業嘅薪金水平係唔錯，絕大部份情況打工係好過做一個「小老闆」，好多時我哋睇到可能相當成功嘅例子，覺得 WOW 人哋自己創業短短幾年已經搵到 xxxx 咁多錢，於是乎自己就都想去試。但如果再 trace 耐啲，你可以跟一跟依個人未來幾年嘅發展，可能佢會一次錯誤輸返哂，能夠可以創業而可以 keep 到本身是一件好難嘅事。生活有時係咁，所以我學識滿足於當下就好。盡可能，喺仍然有機會時，要珍惜身邊嘅家人朋友，多啲打個電話去搵下佢哋，陪伴佢哋，對人好啲，不論識嘅唔識嘅都係。然後眨眼就一世。