#159 每個人的責任（22/06/2025）

今個星期講一啲比較感覺好似題外話啲嘅嘢，但實情都係由來自自己工作上遇到嘅事而引伸諗出嚟嘅一啲體會。

首先，每一個人喺唔同時候，都有自己生活中面對緊嘅問題同困難，呢個係每一個人心入面都有的，亦都唔會有一刻會突然間發現自己生活中冇晒問題。我諗呢個都大家若然有一啲生活經驗都會明白。

同時因為我哋喺呢個社會生活，唔係獨立每一個個體獨自自己生活，而係生活各範疇會同唔同人去接觸，可能購買其他人嘅產品或者使用其他人嘅服務，又或者自己有兄弟姊妹父母親戚，其實我哋每一個人的每一個決定都或多或少牽涉其他人，於是乎如果一個人唔好好處理自己嘅問題，佢會影響其他人，一個人影響另一個人，如此推展出去。例如：假設一個人自己唔好好努力搵錢，終日懶懶惰惰，會影響到自己仔女日後得到嘅教育同埋前途，然後如果仔女又有下一代，係會再繼續影響落去。又例如一個團隊，一班同事一齊合作在唔同崗位做嘢，有同事做得唔好，常做錯/有投訴，係要其他人幫手執手尾，係會一層一層咁樣影響其他同事同公司生意同發展。又或者兩個朋友，其中一個人成日自己啲嘢搞唔好，係會影響到第二位朋友要幫佢處理佢嘅問題，都係影響到人。

當然人無完人，或者有時候有啲事情做唔好都係明白，人之常情，但要不能夠常常都係咁樣，唔得其實就唔好做，或者應該咁講，我哋或者都應該盡量做人要減少自己對其他人帶嚟問題。因為返返開頭第一段，其實每一個人本身生活都有自己遇到嘅問題，都有自己心中煩心嘅事，盡可能我哋減少影響到其他人係最好。

當然我再重覆人無完人，但實在盡可能唔好咁。

我自己個人亦都好小心，希望盡量唔好影響到其他人，唔好為本身其他人再添煩亂，因為真係每一個人自己都有自己嘅問題，每人顧好自己嘅問題已足夠了。

其實依啲道理應該係唔使講出嚟，但有時我都會有想發脾氣時候 —— 我想盡量唔好添煩亂比其他人，我想做好啲，好唔好。我知有時依啲嘢唔應該寫出嚟但作為真實紀錄，我最終都係寫下。