今個星期寫啲特別嘢，寫下自己*唔想*成為一啲點嘅生意，而今次想寫嘅係，Apple。先必須講，我好欣賞 Apple 嘅一直有好多部分佢都真係做得好，包括對細節嘅重視，執到啲嘢好refined先出街、QC 真係做得好（如果睇下 even Samsung 咁大公司，都無法喺 QC 上做到如 Apple 好，而 Samsung 仲有啲「出事」位，其中一個大事係 Note 7 著火事件，Apple 真係喺產品測試同控制上係好啲），而儘管好多人會話 Jony Ive、Scott Fostall 已經走咗，Apple 已經唔係 Apple 云云，但我仍然相信 Apple 內仍有好多好 talented 嘅 designers/ product engineers，我覺得佢哋每日嘅努力係不應抹煞嘅。
但今日想講自己唔想成為好似 Apple 嘅生意係因為一樣嘢：近年佢哋實在太多事做到「僅僅夠」，但價格係明顯上升，而卻非有重大新功能、新嘅創新交比消費者。由 2017 年 iPhone X，去探索消費者可接受的智能電話價格，到最近的 iPhone 16e，一部最低階的 iPhone，亦比以往低階 iPhone SE 貴了四成，Apple 知道佢哋係有 bargaining power 去叫一個貴嘅價錢，因此佢哋係好識去善用哂佢哋可賣貴嘅能力，一步一步逐漸去試再貴啲再貴啲 —— 而依個上試價格係更配合埋佢哋喺近年係明顯減少咗創新 —— 喺 Steve Jobs 離開後，Apple products 喺硬件上、功能上真係進步唔多，以 iPhone 為例，進步可能係背脊有一個鏡頭變兩個鏡頭再變三個，而到依一刻，其實個外型都係咁上下無咩變，MacBook 直頭個 aluminium body 就嚟可以整個 20th year anniversary edition, celebrate 下佢哋重用相同design就快 20 年，of course, if it ain’t broke, don’t fix it. 但再諗下 — 依間 suppose 係一間 design led 嘅公司，佢哋出過彩色半透明膠殼 iMac、彩色金屬 iPod 同埋 iPod click wheel 依啲如此種種嘅公司。會唔會有啲咩係可以改良改進呢，係值得諗嘅，會唔會可以唔好咁再「擠牙膏式」出新功能比用家。當然你知我知大家都知，Apple 現時係清楚自己係有 power 去玩 eco system，透過 eco system 嘅方便去 lock 住一班用戶，再從 ecosystem 唔同party度搵錢。但個人覺得，雖然無可否認佢係一個好聰明嘅方法，但我實在唔係太同意，亦都有機會係之後會出事的。當然，我可能係錯，可能 Apple 係一直依段時間好似創新好慢，錢搵好多，係秘密儲錢去做緊一個大project
如果我有機會做得大規模嘅時候，我會時刻提醒自己，唔好成為現時 Apple 咁，因為雖然咁好似好醒，但咁並不是真係對個世界有貢獻嘅營商方法，喺度，先寫低比未來自己。
#168 幾個得著（24/08/2025）