#192 年少的好（08/02/2026）

喺近幾年工作時，我發現咗一樣嘢，如果創業，年輕真係最大嘅優勢，但依一樣嘢係往往好快就會離你而去。當你年紀踏入 30，依個「優勢」當中嘅好大部份，就會突然消失。我現時剛剛 28，今個星期就特別啲，講下過去我發現年輕喺工作上嘅優勢，希望可以幫到啲比我更加年輕嘅人，可以把握依個機會，因為我哋每一個人都只可以經歷年輕一次，機會過咗係返唔到轉頭，希望以下幫到手。

優勢 1 沒有咁大嘅負擔

如果你係喺比較年輕嘅時候開始工作同開始事業，因為賺到就賺到，賺唔到也不會令你輸蝕了，畢竟你仍未有好多負擔，暫時身邊嘅人應該不會需要你照顧住，所以你有一個小小嘅，一生人一次嘅空窗期，可以試錯，可以試做自己想實現嘅理想。依個空窗期可能只有幾年，喺我嘅情況，就係當時我在大學讀書時候嘅時間去試。因為無人會覺得我喺嗰個時間兼顧讀書時，可以會有咩事業，因此就令我有了這個空間。我仍然好記得當時一路做 Re Pillow 一路讀書，兩邊都要兼顧嘅日子，我後悔當時無好好記錄多啲。記住，一定要讀書一定要讀得好，不能因為話要創業，就做唔好讀書，因為讀書係你嘅安全網，有咩事，咪正正常常畢業搵工，zero time wasted

優勢 2 早開始，可以及早吸收經驗

依個 point 係同人嘅壽命有關。一個人一生可能大約有 70 年，由於頭 20 年係成長，大約 20 歲開始出來工作，而去到60 歲都差不多退休，因此其實真正工作大約係 20-60歲。40 年係一個有限嘅時間，若想要做好啲，其實越早開始係越好，因為一定有會犯錯嘅情況，但因為你早開始，錯嘅學完之後，都仲比別人年輕，亦都即係之後可以套用你學識嘅嘢嘅時間，會比他人長，係一件好事。當然，最好嘅方法想可以更慳時間而可以更加 skip 個 learning curve 一定係睇前人嘅經驗，依個包括可以係睇書，可以係問人，可以係聽人嘅嘅名人分享，因為佢哋真係將佢哋識嘅嘢，集中埋一齊可以比你，你吸收哂，咁樣就不會洗自己用自己嘅時間去試去錯，慳返唔少嘅時間。但不論你係用邊一個方法，越早做都係越好的。

優勢 3 其他前輩會願意幫你/答你問題

後生仲有一個好處係，多數前輩會比較願意回答你嘅問題。不論你幾叻幾醒目睇幾多書都好，其實工作又點會無問題，一定會遇到問題係唔識得解決的，依個時候，問人係好重要。喺我個情況，我都係問咗唔同嘅人點樣做，唔洗覺得自己樣樣都識亦都唔洗怕問人好似顯得自己好蠢，無需要有因為都越後生通常如果30歲下，而且未結婚，特別會受人接受。

優勢 4 身邊沒有人會煩你

其實當你後生開始事，你會發現身邊嘅不論咩人都唔會對你有任何期望。此事並唔係話佢哋睇你唔起唔信你，而係因為你真係後生，啲人唔會覺得你會點樣賺到錢，其實係一件好事嚟的，依個係可以令到你身邊無人會煩你，令你可以好專心咁樣發展你嘅工作，去研究你想研究嘅嘢，去做好件事佢。我可以講嘅係好有可能，喺之後嘅5年10年，如果你嘅事業係正常發展，你將會不能夠可以再有咁平靜可以自己做自己嘢嘅時候，因為每一日你都會面對新嘅問題，而依啲問題可能係同你想做嘅嘢係無關，可能係公司同事之間嘅糾紛，可能係某間舖頭個冷氣壞咗，又或者假設你為了令自己得閒啲，搵咗人幫你手管理依啲事情都好，嗰個人做得唔好搞出一鑊粥然後你要插手收拾.... 又或者身邊有朋友有問題想你幫手。會有好多人搵你麻煩你。亦有可能，你身邊嘅家人女朋友老婆，甚至小朋友可能對你嘅工作時間，比佢哋嘅時間有微言 --- 你已經唔再係 18 歲嘅年輕人，你有你背負一個家庭嘅責任。你一邊在公司有你背負嘅責任，另一邊在家庭有責任。其實依個亦都某種程度上睇係一件好事，但作為一個成年人，你需要照顧依啲事依啲人，一定不如一開初時候會咁 Free。

優勢 5 如果真的失敗，出來都仲係 30 歲，仲可以較易搵返工

通常創業依啲，假設20歲頭開始出嚟開始自己做，多數應該頭一年都沒有問題，但做到 4、5 年，通常就會知道是否可以維持落去。 如果年輕開始，發現有問題，真係頂唔住落去，放棄而再出去搵工，後生一定比老去搵工容易。要再事業重新起步，尚有可以轉彎嘅餘地。當然如果可能一個月仲可以有幾千蚊人工，可以還可以捱多一陣，咁都係好，因為我聽過一句話係，創業最好嘅事係，無人可以迫你放棄，而未去到你去世一刻，其實無人能夠論斷你係成功定係失敗。不過在此都想講一樣嘢係依個世界好多人鍾意將自己同其他人比較，實在其實係會令到自己好辛苦，如果再常常比較，只會好易令到自己行錯方向，為了降低成本增加利潤而做錯事，最後會引致失敗。