#193 進入主流的困難、新年前和朋友見面（15/02/2025）

如何去到下一階段係一個我最近一個頗為 struggle 緊嘅位。因為通常要自己 from the ground up 去諗點樣做係極難，因此我嘗試做法會係 reference 其他已經過咗我依個階段嘅公司，睇下有沒有啲咩可以參考到。奈何我認識嘅人唔夠多，似乎我認識嘅人，佢哋一係就可能係我想去到下一階段咁上下，但可能因為個人唔係太老實或者對產品對客人唔夠認真或者太過刻薄員工，只係太為「錢」去工作，唔係我想做嘅事。開頭我以為有啲公司係我欣賞嘅我以為佢哋係真係表裏如一，但原來識落唔係依一回事，我只好淡然離去。另一啲就公司已經太過大規模。已經完全超越我可以學習到嘅嘢，亦係無法參考到。所以變咗始乎我係需要自己由頭自己去學習了，唔可以嘗試搵人跟同問。或者亦都等我過年之後，搵個前輩問下意見先得。 

追求規模嘅核心係因為我想產品可以到到更多人手上。我想可以用平啲價錢做到更好質素嘅貨，並且慳咗嘅錢係可以去到個客手上（依個緊要因為好多人係想貪咗中間個差價，佢哋做大係為自己，不是為人去諗，佢忘記咗佢開頭嘅自己都曾經係一個普通人，都會行街購物消費，會想可以用好價錢買到好產品，解決生活問題），我想係將公司做到樣樣都可以做得好，包括產品設計、品質管理、人事、門市服務、售後服務、款式等，並以最 efficient 最有效率嘅方法，最少成本流去其他地方，將產品送到客人手上。當然，依個係一個極難嘅事，因為我無可能一個人做哂所有事，所以要靠其他同事幫手。但放手又係另一樣藝術，因為放手期間，唔一定係會順利，中間交接唔好話邊個，但有甩漏係都會可能發生。一邊就客人投訴你點解咁差㗎！仲話要進入主流點樣做！另一邊你知道其實正係因為咁樣交接中先出現依個問題，你想放手，但放唔落到手，一放手就出問題，點算好。 

喺依啲位到遊走係極困難的，因為論錢和實力，我哋係不夠大公司嚟，但客對你嘅 expectation 會亦都因住「佢覺得你不是小公司」而要做到有 semi-大公司質素，依個係喺各層面上都會遇到，所以可能係咁，通常依啲中間位，唔大唔細係好少公司的，因為好易會死，因為多數都會，我現時就係kick喺依度。 

我現時亦都密切留意緊唔同各行業好似我依個規模嘅公司佢哋到底係如何情況，成功同失敗例子都睇，睇佢哋到底係點樣 cross this chasm. 或者如果係中間失敗，個失敗位置係喺邊。點解會失敗。 

最近依個星期同一位著名嘅專業 PR 飲咖啡傾計，亦都去探訪咁一啲朋友。確實係令到我心定咗啲嘅。有時做嘢耐咗，會覺得孤獨同埋困難無人明白，亦都當然會覺得唔知咁辛苦做咩，不如去搵份工更好。我發現其實創業係一樣都幾熱血與夢想嘅事，同搵錢無咩關係。有機會見下其他人（要係心地善良，好嘅人）互相 support 下，係好緊要。