#213 2026 年中的小小反思 （05/07/2026）

中學時期，中文科修讀《師說》，當中有一句至今仍常喺腦內：「小學而大遺，吾未見其明也」。依句說話當時聽到後，一直擺心入面，實在好多好多實例，我哋做人係真係會「小學而大遺」，即係好緊張好緊張一啲細嘅事，捉住佢嚟要做到好盡善盡美，但係喺大事上面就可能行錯咗，忽略咗。

我舉個例子。節儉係一個美德，有啲人佢計算得非常精明，慳得非常之盡，喺個生活細節上面佢真係慳得一蚊得一蚊，但係就係因為呢個慳儉嘅性格，令到佢可能唔小心買咗啲有問題嘅產品，從而造成健康問題，令到入醫院醫病需要花費好多錢，講緊係幾十幾十萬去數上去。慳錢係好，但係慳到呢一個地步嘅時候，反而係其實害咗自己。

近依一年開始慢慢多咗感悟，覺得做人一定要首先一定要識得分大細。咩係大事小事，咩係主次，時間點樣分配。見證很多好慘嘅例子，做錯一個大嘅決定同埋方向，係會翻唔到身。分大細嘅方法我自己係咁樣睇：五年之後，呢件事情仲會否重要？有啲小事情，做錯咗，五年之後你唔會仲會耿耿於懷。咁咪由佢。例如你今日買咗件黑色衫定買件白色衫，五年之後你應該都唔會對你有任何好重大嘅人生影響，咁你就由佢啦。但有啲決定係可以影響好深遠，又或者決定係你現在唔決定，其實都係一個決定，令到你之後嘅人生難行咗。依啲決定要小心做。行錯咗而要 Reverse 返再去再做係極花時間。所以有時我會覺得，我寧可如果喺唔清楚點做時，問多啲意見同花多幾個月去 Sort out 事情，Sort out 哂先再行，咁會行得順好多。如果唔係，照樣去去去，行錯咗，再行返轉頭係仲花時間。同樣人有啲興趣有嗜好係好事，但唔好太迷，迷到花太多心神時間落去，玩到唔記得咗自己嘅工作任務首要係咩，會慢慢玩物喪志。又或者係有時唔想得罪人/令人唔開心，有啲應做嘅事無做，最後會自己受害。

要把握人生每個機會時間，做最好嘅決定，盡自己嘅能力。