#225 太早擴展不是好事（27/09/2026）

中秋節快樂！很多人覺得公司擴展係好事，但我唔係咁睇。公司嘅規模好應該係要同個人能力掛鉤，正如個人嘅財政狀況係應該要同個人管理錢嘅能力掛鉤一樣。咁樣舉例會比較易明。如果一個人佢唔識得如何去管理好自己嘅錢，如果突然有一個機會比咗一大筆錢佢（e.g. 佢中六合彩/佢父母比好多錢佢/佢去借貸），你幾年之後見返佢，其實佢可能的財政狀況並唔係如你想像咁大改善，因為其實每個人佢嘅情況往往都會回歸返佢嘅能力，喺依個情況係佢如何管理財政嘅能力。所以對大部分情況，一個 natural 嘅 growth curve 係最好嘅。而相同情況，喺公司嘅 case，都係一個 natural 嘅 growth curve 係最好，如果太早成功（所謂「爆紅」）或者有外來資金注入，好多時本身嘅營運者係唔識管理而當一個浪埋嚟，或者經歷長啲時間，就會見真章。

依個 Case 其實喺某程度上，係有曾經喺 Re Pillow 上發生。啱啱 Re Pillow 經歷第 7 個中秋，講啲之前未講過嘅事。其實 Re Pillow 開頭係源於我為了解決自己嘅問題，所以而去做的，而因為喺依件事其實係都算係我第一次去做一個 online 網店嘅 Product-based 生意，我係唔太識點去管理同去做，我唯一當時識嘅，就係做嗰個 Re Pillow 枕頭 --- 非常純粹，但同時非常喺營商上毫無經驗。而亦都慶幸係啲客人好鍾意 Re Pillow，產品本身確實解決了問題，以致喺初期 e.g. 2021-22 年，曾有段時間都有一定嘅增長。雖然對於任何做生意嘅人睇，都會覺得依個生意係非常細，但對當時 20 出頭嘅我，已是好唔識處理嘅情況。依一個「產品好得，但營商沒有經驗」嘅情況，就係有少少似你比一間極大嘅誇國企業，比一個10歲小朋友管理一樣 --- 佢唔識做。所以其實喺 Re Pillow 開頭之後係極為慘痛，因為每一樣都係一種補課，同埋一起了個頭，你有好多問題原來要解決。而當甚至你以為自己識做生意而但其實你好多嘢都仍需學習時，係亦係不斷受打擊嘅一個過程，尤其年輕人總會帶一啲衝勁，再加上 COVID 後嘅經濟轉差，所以係有其困難。我因此明白亦都點解好多喺 COVID 前後創業嘅小公司喺依幾年執笠，生意難嘅位係要經歷唔同嘅 economic cycle 同改變都仍可繼續，咁先叻㗎。

公司嘅 succession 亦係一個問題，假設一人能夠做到令到公司可以經過到不同經濟週期，但人都有自己週期，要如何交落去做，就係下一個問題。要有能力嘅人跟，而佢亦有心有力去做，而亦要不是求其做，咁先可以。